Lögfræðingarnir Þórir Helgi Sigvaldason og Kristinn Svansson hafa stofnað fyrirtækið Identi sem sérhæfir sig í aðgerðum gegn peningaþvætti og fjármögnun hryðjuverka.
Þeir segja hugmyndina að stofnun fyrirtækisins hafa fæðst í kjölfar setningu nýrra laga um aðgerðir gegn peningaþvætti og fjármögnun hryðjuverka. Með lögunum voru skyldur látnar ná til aðila sem hafa ekki þurft að láta málaflokkinn sig varða hingað til, svo sem fasteignasala, bifreiðasala, bókara og endurskoðenda.
„Eftir setningu nýju peningaþvættislaganna varð okkur ljóst að þörf væri á einföldum og praktískum lausnum fyrir smærri aðila. Skatturinn, sem er eftirlitsaðilinn í málaflokknum, hefur hert eftirlitið upp á síðkastið og látið fjölmargar sektir falla á aðila sem hafa ekki sinnt lagaskyldum sínum með fullnægjandi hætti. Er því brýnt að tilkynningarskyldir aðilar láti sig málaflokkinn varða og gæti þess að innviðir séu í lagi er viðkoma aðgerðum gegn peningaþvætti og fjármögnun hryðjuverka svo koma megi í veg fyrir orðsporshnekki og fjártjón í kjölfar stjórnvaldsaðgerða,“ segir Þórir Helgi, framkvæmdastjóri Identi.
Identi býður upp á heildstæða lausn í baráttunni gegn peningaþvætti og fjármögnun, hvort sem það er í formi hugbúnaðarlausnar til að einfalda hlítnikröfur eða ráðgjafar. „Í þeim efnum má nefna að Identi býður tilkynningarskyldum aðilum einfaldan og hagkvæman hugbúnað til að framkvæma áreiðanleikakannanir á tilvonandi viðskiptavinum, áhættumat, stefnur og verkferla og fræðslu fyrir starfsfólk, en þetta eru þau grundvallaratriði sem verða að vera til staðar í rekstri tilkynningarskyldra aðila,“ segir Þórir Helgi.
Hundruð aðila nýta þjónustu Identi til að gera áreiðanleikakannanir á viðskiptavinum sínum að sögn Þóris Helga. „Identi hefur jafnframt samið grunn að áhættumati fyrir ýmsar starfsstéttir og unnið sérhæft áhættumat fyrir fjölda tilkynningarskylda aðila. Þá hefur Identi jafnframt staðið fyrir fræðslu fyrir ýmsa aðila ásamt því að sinna réttargæslu fyrir tilkynningarskylda aðila sem sætt hafa stjórnvaldsaðgerðum af hálfu Skattsins og Fjármálaeftirlitsins,“ segir Þórir Helgi enn fremur.
