Þar er haft eftir Sönnu: „Laun stjórnmálafólks eru of há á Íslandi og sósíalistar hafa lagt til að þau verði lækkuð. Þar til okkur tekst að lækka launin almennt kjósum við að lækka laun okkar sjálfra með þessum hætti, flytja fé sem við fáum til persónulegra nota inn í hagsmunabaráttu fólks sem stendur miklu verr en við.“

Þessi samanlagði styrkur Sönnu og Trausta mun nema 2,4 milljónum króna á ári og kemur til viðbótar við framlag borgarsjóðs til Sósíalistaflokksins sem er rúmar 4,5 milljónir á ári en Sósíalistaflokkurinn hefur ákveðið að færa framlag borgarsjóðs í Vorstjörnuna.

„Reykjavíkurborg styrkir flokka og stjórnmálafólk með þeim rökum að hún sé að örva lýðræðið í borginni. Með því að styrkja hagsmuna- og réttlætisbaráttu hópa sem eiga í erfiðleikum með að halda uppi sinni baráttu eflum við lýðræðið miklu betur en að eyða þessum peningum í sjálf okkur eða flokkinn,“ segir Trausti. 

Í tilkynningu segir að Sanna og Trausti bendi á að fátækt fólk á Íslandi þurfi að reka hagsmunabaráttu sína í samkeppni við aðila sem hafi mun meiri fjárráð, þá ekki síst hagsmunasamtök auðugustu fjármagnseigendanna og allra stærstu eigenda allra stærstu fyrirtækjanna í landinu. Þetta þýði að þeir fátæku og valdalausu verði oft undir í baráttunni. Í tilkynningu segir: „Auðvaldið valtar yfir allt þótt það sé að boða lygar á meðan að fátæka fólkið reynir að koma sannleikanum á framfæri.“

Sanna segir að fjölmiðlar reyni lítið að vega upp þennan aðstöðumun.

„Hagsmunasamtök allra ríkasta fólksins, kannski í reynd aðeins 50 til 60 manns, drottna yfir allri umræðu í landinu. Raddir fórnarlamba þeirra, hinna fátæku og valdalausu, heyrast varla. Ef fjölmiðlar væru lýðræðislegir myndu þeir alla daga segja frá kröfum og sjónarmiðum almennings en geta hugmynda hinna ríku einu sinni eða tvisvar á ári.“

Sósíalistaflokkurinn hafi eins ákveðið að leggja helminginn af framlagi ríkissjóðs til flokksins inn í Vorstjörnuna, en það séu um 13 milljónir á þessu ári. Hinn helmingurinn fari til uppbyggingar Samstöðvarinnar. Samanlagt er Sósíalistaflokkurinn og borgarfulltrúar hans að leggja Vorstjörnunni til rúmlega 19,9 milljónir krónur á ári.

„Vorstjarnan styrkti Samtök leigjenda um fimm milljónir króna um helgina og mun halda áfram að styrkja félög og samtök almennings,“ segir Védís Guðjónsdóttir, formaður stjórnar Vorstjörnunnar. „Við höfum byggt upp félagsaðstöðu í Bolholti 6 þar sem samtök og félög fólks getur fengið skrifstofu- og fundaraðstöðu og við eigum tæki og tól til funda og mótmæla sem við lánum fólki í réttlætisbaráttu. Auk þess stendur öllu fólki í réttlætisbaráttu til boða að búa til hlaðsvarps-sjónvarpsþætti sem Samstöðin dreifir. Vorstjarnan er í mótun og ég hvet fólk til að ganga til liðs við félagið og taka þátt í þeirri mótun.·

Áhugasamir geta skráð sig sem félaga í Vorstjörnunni á vorstjarnan.is og valið félagsgjöld, bæði upphæð og hversu ört þau eru innheimt. Óháð félagsgjöldum hefur hver félagi eitt atkvæði. Aðalfundur Vorstjörnunnar verður haldinn í haust, verður auglýstur nánar.