Brynjar Níelsson, þingmaður Sjálfstæðisflokksins, endaði í 5. sæti í prófkjöri Sjálfstæðisflokksins í Reykjavík á dögunum og ætti það að skila honum 3. sæti á öðrum lista flokksins í kjördæmunum. Vinkona hans, Sigríður Á. Andersen, var ekki meðal átta efstu í prófkjörinu en bæði sóttust eftir 2. sæti.

Brynjar og Sigríður hafa gefið út að þau ætli ekki að bjóða sig fram til Alþingis í næstu kosningum vegna slæmrar niðurstöðu prófkjörsins en margir hafa þó skorað á þau að endurskoða þá ákvörðun. 3. sæti gæti skilað sér þingsæti fyrir Brynjar í komandi kosningum.

Einhverjir gleðjast yfir því að Sigríður og Brynjar muni ekki sitja á þingi lengur en skoðanir þeirra eru ekki í takt við pólitískan rétttrúnað og eru þau ansi umdeild. Brynjar lætur fólk sem efast um Sigríði heyra það í færslu á Facebook-síðu sinni í dag.

„Ég tek eftir því á samfélagsmiðlunum að það er ósvikinn fögnuður „frjálslyndu aflanna“ í Sjálfstæðisflokknum með úrslitin í prófkjörunum, nema kannski í Kraganum þar sem grámosinn glóir. Það tókst að losa sig við „íhaldskerlinguna“ og „andkonuna“, Sigríði Andersen,“ segir Brynjar en hann vill meina að Sigríður sé frjálslyndari en allt þetta fólk til samans.

„Má segja að hún hafi ein síns liðs barist að einhverjum krafti fyrir raunverulegu frelsi einstaklingsins til orða og athafna. Sigríður Andersen er ekki fullkomin en hefur, ólíkt mörgum öðrum, skoðanir og berst fyrir stefnu flokksins. Svona stjórnmálamenn eru ekki á hverju strái, eins og sagt er,“ segir Brynjar og bætir við að stjórnmálamenn eins og Sigríður séu eiginlega alveg horfnir.

Hvað gerist næst hjá Sigríði og Brynjari á næstunni er enn óljóst en Brynjar hefur grínast með að opna lögmannsstofuna „Níelsson og Andersen“ og að hann ætli að opna OnlyFans-síðu. Það verður að teljast ansi ólíklegt að Brynjar opni slíka síðu en eins og skáldið sagði: „Aldrei segja aldrei“