Fréttablaðið skýrir frá þessu í dag. „Þetta er eiginlega mjög bagaleg staða og að þetta mál komi upp núna sýnir þörfina á að koma starfi hennar í gang,“ er haft eftir Sigurði Kristinssyni, prófessor í heimspeki og formanni nefndarinnar.
Hún á meðal annars að hafa eftirlit með að siðferðileg viðmið séu í heiðri höfð í starfi vísindamanna. Bergsveinn Birgisson, rithöfundur og fræðimaður, hefur sent kvörtun til nefndarinnar vegna meints ritstuldar Ásgeirs Jónssonar, seðlabankastjóra.
Forsætisráðherra skipaði nefndina í desember 2019 en skömmu síðar var hún færð undir menntamálaráðuneytið. Nú stefnir í að hún veðri færð undir nýtt ráðuneyti vísinda og nýsköpunar.
„Þegar menntamálaráðuneytið tók við nefndinni og farið var að reikna út hvað starfið muni kosta kom í ljós að það er mun meira en upphaflega var áætlað,“ er haft eftir Sigurði sem vísaði einnig til hinna nýju laga og segir að nefndinni sé ætlað mikið starf, sérstaklega í upphafi. Það þurfi að safna upplýsingum og móta verkferla, meðal annars til að nefndin geti tekið við erindum. Ekki hafi verið gert ráð fyrir neinum kostnaði við nefndina nema ferðakostnaði. „Svo veit ég ekki betur en það hafi verið þrýst á þetta í fjárlagagerð síðan, en ekkert fé komið í þetta enn og ekki heldur í fjárlagagerð fyrir næsta ár,“ sagði Sigurður.
Hann sagðist vera búinn að fá kvörtun Bergsveins og hafi skýrt honum frá að hún verði tekin til skoðunar um leið og nefndin geti tekið til starfa.
