„Ég fékk gæsahúð og efast um að ég hafi séð Ármann bæjarstjóra Kópavogs nokkurn tímann jafnglaðan – einsog þegar sigurtillagan um hönnun á nýrri Fossvogsbrú var kynnt í dag,“ skrifaði Dagur B. Eggertsson, borgarstjóri Reykjavíkur, á Facebooksíðu sína í dag.
Dagur segir brúna stórglæsilega, þar sé hugsað fyrir skjóli gegn vindum og hún sé frábær fyrir bæði gangandi og hjólandi. Þá segir hann að brúin sé snilld fyrir Borgarlínuna því með tilkomu hennar muni það taka 6 mínútur í stað sautján að fara með almenningssamgöngum frá Hamraborg í Kópavogi yfir í Háskólann í Reykjavík.
Sigurjón Ólafsson, tökumaður hjá Stöð 2, smellti mynd af þeim félögum, Degi og Ármanni, við þetta tækifæri og deildi við færsluna hans Dags. Við myndina skrifaði Dagur síðan: „Nákvæmlega það sem ég er að tala um. Engu líkara en að við séum að giftast. Slík var gleðin.“
Þeir sem komu með vinningstillöguna að brúnni voru EGLA og breskir arkitektar. Þá eru ljósahönnuðir hluti af teyminu.
