Í næstu viku kemur út bókin Málsvörn Jóns Ásgeirs Jóhannessonar eftir Einar Kárason. Þar segir Jón Ásgeir sjálfur viðskiptasögu sína. Viðskiptablaðið hefur bókina undir höndum og birtir kaflabrot þar sem Jón Ásgeir ber fyrrverandi samstarfsmanni sínum, Gunnari Smára Egilssyni, stofnanda Sósíalistaflokksins, ekki vel söguna, en Gunnar Smári stýrði fjölmiðlaveldi Jóns Ásgeirs um skeið á árunum fyrir hrun.

Jón Ásgeir segir að Gunnar Smári hafi verið að missa tökin á rekstrinum og þá hafi verið fundið upp á því að stofna fríblað í Danmörku, Nyhedsavisen. Það blað var gefið út á annað ár. Jón Ásgeir segir:

„En það var engin heimavinna unnin. Það var tilkynnt digurbarkalega á blaðamannafundi um stofnun blaðsins löngu áður en það átti að fara að koma út. Og gefið í skyn að samkeppnin mætti fara að vara sig. Sem þýddi að hún hafði nægan tíma til að undirbúa það, starta sínum eigin fríblöðum og svo framvegis. Svo höfðu menn ekkert hugsað út í það að þótt það sé yfirleitt opið að utan að póstkössum og lúgum hér á landi, þá þarf lykla til að komast að þeim víðast hvar í Danmörku. Gunnar Smári lét sig á endanum hverfa og tapið var gígantískt, og líka á öðru fríblaði, Boston Now vestanhafs, þótt ekki væri það sambærilegt við tapið í Danmörku.“

Jón Ásgeir segir síðan að Gunnar Smári hafi byrjað að tala illa um hann og fyrirtæki hans eftir hrun:

„Eftir hrun var Gunnar Smári síðan fljótur að byrja að drulla okkur út í sínum ummælum og skrifum. Og svo er hann sósíalistaforingi í dag, maður sem í þá daga nennti helst ekki til Danmerkur nema að fá undir sig einkaþotu.“