Margir bíða með öndina í hálsinum eftir næstu skrefum ríkisstjórnarinnar í sóttvarnaraðgerðum innanlands. Þórólfur Guðnason, sóttavarnarlæknir, sendi Svandísi Svavarsdóttur, heilbrigðisráðherra, minnisblað í gær sem talið er innihalda tillögur um hertar aðgerðir.
Mikil fjölgun smita hefur verið undanfarna daga en 213 smit hafa greinst síðustu vikuna. Það var til þess að ákveðið var að grípa til hertra aðgerða á lanadamærunum til þess að sporna við því að smit bærust inn í landið. Þórólfur lagði þó áherslu á að það eitt og sér myndi ekki stöðva faraldurinn og að hans mati væri skynsamlegt að grípa strax inn í frekar en að bíða þar til faraldurinn væri kominn á fullt.
Ljóst er þó að minni eining er innan ríkisstjórnarnir en áður um aðgerðir. Það blasti við þegar að ákvörðunin um hertar aðgerðir við landamærin var tekin. Þannig sagði Áslaug Arna Sigurbjörnsdóttir, dómsmálaráðherra, við það tilefni að hún teldi aðgerðirnar óþarfar en legðist þó ekki gegn þeim. Þá sagði hún skyldu þeirra sem sitja í ríkisstjórn að tryggja áfram festu og skýrleika varðandi ákvarðanir.
Það má því telja líklegt að einhver átök verða innan ríkisstjórnarinnar um næstu skref.
Einn þeirra sem telja að upp úr sjóði er blaðamaðurinn og samfélagsrýnirinn Jakob Bjarnar Grétarsson. Hann varpaði fram athyglisverðu kenningu um að Íslendingar geti búið sig undir stjórnarslit.
„Ég spái því að stjórnin muni springa útaf minnisblaði Þórólfs. Það skiptir stjórnarflokkana nákvæmlega engu máli, komnir með allt sitt í hús en gæti hins vegar reynst gott veganesti fyrir þá í kosningabaráttuna. Þeir geta þá sperrt sig við misvonsviknir kjósendur sína og slegið öll vopn úr höndum hinnar ósamstæðu stjórnarandstöðu,“ segir Jakob Bjarnar.
