Halla Signý Kristjánsdóttir, þingmaður Framsóknarflokksins í Norðausturkjördæmi, skorar á Svandísi Svavarsdóttur heilbrigðisráðherra í færslu sem hún birti á Facebook-síðu sinni í dag. Hún segist styðja reglugerð Svandísar um sóttvarnarhúsin en segir það vanta bráðabirgðar lagaákvæði.„Ég hef verið þeirra skoðunar að mikilvægt sé að skjóta lagastoð undir reglugerð um sóttvarnarhúsin sem skyldar alla sem ferðast til landsins í sóttvarnarhús. Hinsvegar hefur ekki náðst samstaða innan ríkisstjórnarinnar um það og ekki heldur innan velferðarnefndar sem ég sit í,“ segir Halla en í velferðarnefnd Alþingis sitja ásamt Höllu, Ólafur Þór Gunnarsson, Ásmundur Friðriksson, Anna Kolbrún Árnadóttir, Guðmundur Ingi Kristinsson, Halldóra Mogensen, Lilja Rafney Magnúsdóttir, Vilhjálmur Árnason og Helga Vala Helgadóttir, formaður nefndarinnar.

„Í gegnum þennan faraldur höfum við fylgt eftir ráðleggingum sóttvarnayfirvalda með eftirtektarverðum árangri og því er mikilvægt að sóttvarnalæknir hafi þær lagastoðir fyrir þeim aðgerðum sem hann telur mikilvægar til að tryggja líf og heilsu okkar. Það er því okkar löggjafans að tryggja þessa lagastoð, svo lengi sem við gætum meðalhófs. Það skiptir máli að fólk hér geti notið góðs að þeim góða árangri sem náðst hefur í sóttvörnum innanlands,“ segir hún og skorar á Svandísi að leggja fram bráðabirgðar lagaákvæði sem nær utan um tillögur sóttvarnalæknis.

„Tilgangurinn helgar meðalið!“

https://www.facebook.com/halla.s.kristjansdottir/posts/10157500167171511