Kolbrún Bergþórsdóttir, blaðamaður á Fréttablaðinu, segir að Katrín Jakobsdóttir forsætisráðherra sé langhæfasti stjórnmálamaður landsins og óhjákvæmilegt sé að hún verði næsti forsætisráðherra, hvort sem núvrandi stjórn heldur velli eða mynduð verður vinstri stjórn með VG innanborðs.

Frá þessu segir leiðara Fréttablaðsins í dag. Kolbrún skrifar:

„Þjóðin er að stórum hluta þegar búin að gera upp við sig hvern hún vill sem forsætisráðherra. KatrínJakobsdóttir, núverandi forsætisráðherra, nýtur yfirburða trausts. Hún hefur verið einkar farsæll forsætisráðherra, sterk og ákveðin manneskja, sanngjörn og býr yfir nauðsynlegri samningalipurð.
Meira að segja þeir sem andvarpa yfir tilveru Vinstri grænna (og þeir eru ansi margir) viðurkenna flestir að enginn núlifandi stjórnmálamaður er betur til þess fallinn að gegna starfi forsætisráðherra en einmitt Katrín Jakobsdóttir. Haldi núverandi ríkisstjórn áfram veginn eftir næstu kosningar blasir við að Katrín mun verða leiðtogi þeirrar stjórnar. Verði annars konar stjórnarmynstur, en þó með Vinstri græn innanborðs, er nauðsynlegt fyrir þá ríkisstjórnarflokka að velja Katrínu sem forsætisráðherra, enda er hún langöflugasti stjórnmálamaður landsins. Annað val á forsætisráðherra myndi veikja þá stjórn til muna.“

Kolbrún segir að þetta sé sérstaklega athyglisvert í ljósi þess að traust til stjórnmálamanna sé almennt frekar lítið.

Kolbrún segir ennfremur að núverandi ríkisstjórn hafi staðið sig þokkalega og hún gæti haldið velli. Það sé „ekki sérlega ógnvekjandi tilhugsun“.