Fréttablaðið skýrir frá þessu í dag. Fram kemur að það hafi verið Ísorka, sem selur hleðslustöðvar, sem hafi kært ON í júlí á síðasta ári. Þá kom fram í umfjöllun Fréttablaðsins um málið að kæran sé í á annað hundrað liðum. ON er í henni sakað um að nota markaðsráðandi stöðu á raforkumarkaði til að koma sér í einokunarstöðu á miðlun rafmagns til rafbíla. Orkuveita Reykjavíkur á ON.
Samkeppniseftirlitið tilkynnti ON um rannsóknina í september. ON hefur sent Samkeppniseftirlitinu þrjú bréf með athugasemdum við málið.
„Að virtum þeim upplýsingum og gögnum sem aflað hefur verið við forathugun málsins og í ljósi þess að umkvörtuð háttsemi virðist enn til staðar og vísbendingar um að hún raski samkeppni, hefur Samkeppniseftirlitið ákveðið að hefja formlega rannsókn á háttsemi ON á mögulegum markaði fyrir hleðslur, hleðslustöðvar og rafmagn, sbr. nánar erindi kvartanda sem félagið hefur undir höndum,“
segir í bréfi Samkeppniseftirlitsins til ON þar sem tilkynnt er um rannsóknina. Einnig er óskað eftir frekari gögnum vegna málsins.
Fréttablaðið hefur eftir Berglindi Rán Ólafsdóttur, framkvæmdastýru ON, að fyrirtækið hafi gegnt lykilhlutverki við uppbyggingu innviða fyrir rafbíla hér á landi síðustu sex ár.
„Til þess að rafbílavæðing Íslands gæti orðið að veruleika þurftu innviðirnir að koma á undan eftirspurninni, þ.e. rafbílunum, sem voru um 100 talsins þegar ON hóf vegferðina,“
hefur Fréttablaðið eftir henni. Hún sagði jafnframt að styrkir frá Orkusjóði hafi verið mikilvægir við uppbyggingu innviða fyrir rafbíla, bæði fyrir ON og önnur fyrirtæki sem hafa tekið þátt í þróuninni.
„Markaður með hleðslustöðvar á Íslandi er lítill og frekari uppbygging háð framlagi frá ríkinu í þeim tilgangi að stuðla að fjárfestingum sem stuðla að því að Ísland nái settum loftslagsmarkmiðum,“
sagði hún og sagði jafnframt að skoðun Samkeppniseftirlitsins á markaðnum hafi komið ON á óvart vegna þess hversu lítill markaðurinn er, auk þess sem hann sé á algjöru frumstigi uppbyggingar. Engu að síður muni skoðun Samkeppniseftirlitsins verða til þess að staða og skipulag markaðarins skýrist og sagðist hún vonast til að niðurstaðan verði hvetjandi fyrir áframhaldandi uppbyggingu innviða fyrir rafbíla.
