„Hefur einhver spurt forsætisráðherra út í það hvenær hún vissi af þessu stóra máli sem nú liggur fyrir að hefur skaðað hagsmuni Íslands? Hvað með aðra ráðherra? Hvað og hverjir vissu hvað í vændum var?“

Svo spyr Helga Vala Helgadóttir, þingmaður Samfylkingarinnar á Facebook þann 31. desember síðastliðinn vegna Samherjamálsins, en rökstuddur grunur leikur á um að félagið hafi greitt hundruð milljóna í mútur til að komast yfir kvóta í Namibíu.

Helga Vala nefnir að vitað sé að Erna Solberg, forsætisráðherra Noregs, hafi vitað af málinu áður en það komst í fréttir og að henni og Katrínu Jakobsdóttur sé vel til vina:

„Það hefur nefnilega komið í ljós að Erna Solberg, forsætisráðherra Noregs vissi af málinu vegna aðkomu hins norska banka og áhrifa sem Samherjaskjölin hafa á norskt hagkerfi. Þá hefur einnig komið fram að þeim Katrínu Jakobsdóttur forsætisráðherra er vel til vina og loks að Katrín fundaði með norska sendiherranum fyrir birtingu Samherjaskjala. „

Fátt um svör

Eyjan sendi fyrirspurn á aðstoðarmann Katrínar Jakobsdóttur forsætisráðherra fyrir helgi hvort eitthvað væri til í þessum kenningum Helgu Völu. Var fyrirspurnin móttekin, en engin svör hafa enn borist þrátt fyrir ítrekun í morgun.

Eflaust er of snemmt að draga ályktanir af þögninni, en ætla má að aðstoðarmönnum forsætisráðherra væri ljúft og skylt að svara spurningunni neitandi ef Katrín vissi ekki af málinu áður, líkt og ætla má af viðbrögðum hennar strax eftir þátt Kveiks um miðjan nóvember:

„Ég var mjög slegin og mér var mjög brugðið við að horfa á þau gögn sem voru birt í fréttaskýringaþættinum Kveik í gærkvöldi. Það er alveg ljóst að ef þessir málavextir reynast réttir, eins og þeir voru birtir þarna, þá er þetta mál allt hið versta og til skammar fyrir Samherja og mikið áhyggjuefni fyrir íslenskan sjávarútveg og íslenskt atvinnulíf. Þetta mál þarf núna að rannsaka ofan í kjölinn.“

Sjá nánar: Katrín krefst rannsóknar:„Til skammar fyrir Samherja – minna óþægilega á gamaldags nýlenduherra“

Svörin verða birt um leið ef þau berast.