Líkt og greint var frá í gærkvöldi var búið að nást samkomulag um þinglok við fjóra af fimm stjórnarandstöðuflokkum Alþingis í gær. Voru samningaviðræðurnar sagðar stranda á Miðflokknum.
Vísir greindi síðan frá því í gærkvöldi að það væri Katrín Jakobsdóttir sem hefði slitið viðræðum við Miðflokkinn fyrr um daginn, þar sem Sigmundur Davíð Gunnlaugsson, formaður Miðflokksins, hefði krafist þess að frumvarp um kynrænt sjálfræði yrði tekið af dagskrá, sem Katrín hafi ekki viljað verða við, en þá hafði náðst samkomulag um öll önnur mál, meðal annars varðandi breytingar á lögum um innflutning á ófrystu kjöti.
Voru þær viðræður síðan teknar upp aftur síðar þann dag, samkvæmt RÚV.
Morgunblaðið hafði eftir Bergþóri Ólafssyni, þingmanni Miðflokksins, að Miðflokkurinn hafi verið búinn að undirrita samkomulagið um þinglok, en einn stjórnarflokkurinn hafi ekki viljað samþykkja það og þar hafi hnífurinn staðið í kúnni.
RÚV greindi frá því síðan um miðnætti að ein af ástæðunum fyrir að ekki náðust samningar, var að Bjarni Benediktsson, fjármálaráðherra Sjálfstæðisflokksins, hafi hafnað samkomulaginu.
Var talað við Birgi Ármannsson, þingflokksformann Sjálfstæðisflokksins, sem sagði þetta eina af ástæðunum, en ýmsu hefði verið kastað upp í samningaferlinu. Lítil bjartsýni væri hinsvegar á að ná saman, þó hlutirnir gætu breyst hratt:
„Staðan er sú að menn hafa verið að kasta á milli sín hugmyndum og verið að velta ýmsu fyrir sér. Menn hafa verið að þokast nær í sumum málum en fjær í öðrum.“
