Ólöf Skaftadóttir, ritstjóri Fréttablaðsins, fjallar um hræðsluáróður og falsfréttir í leiðara dagsins og hvernig slíkt getur mótað huga fólks á fölskum forsendum. Tekur hún dæmi af Brexit umræðunni í Bretlandi, þar sem meirihluti íbúa í smábæ í Suður-Wales, sem notið höfðu góðs af Evrópusambandinu varðandi 350 milljón punda uppbyggingu og nóg var um vinnu eftir mögur ár á undan vegna lokunar kolanámu, kusu samt sem áður með Brexit. Var þetta tengt við mátt Facebook og þann áróður og falsfréttir sem þar þrífst.

Ólöf tengir þetta beint við umræðuna um þriðja orkupakkann hér á landi:

„Í könnun Fréttablaðsins í gær kom í ljós að tæpur helmingur vill ekki að Alþingi samþykki þriðja orkupakkann. Innan við þriðjungur er því fylgjandi. Tæp 59 prósent segjast ekki hafa kynnt sér málið eða kynnt sér það illa. Athygli vekur að stuðningur við pakkann eykst eftir því sem fólk hefur kynnt sér málið betur.“

Þá hjólar Ólöf í Ingu Sæland, formann Flokks fólksins, sem berst hart gegn innleiðingu orkupakkans ásamt Miðflokknum:

„Inga Sæland, formaður Flokks fólksins, fór mikinn í Silfrinu síðasta sunnudag. Hún virðist halda að með innleiðingu orkupakkans getum við öll, ég og þú, virkjað ár og lagt sæstreng án opinberra afskipta. Þetta er ekki rétt. Lágmarkskrafa er að stjórnmálamenn kynni sér mál sem fjallað er um. Pólitíkusar mega heldur ekki verða meðvirkir bullinu. Svona málflutning þarf að leiðrétta. Hátt og snjallt. Hann er ógn við sjálft lýðræðið.“