Úrskurðarnefnd upplýsingamála hefur nú úrskurðað að Ríkisútvarpinu hafi verið heimilt að leyfa umsækjendum um starf útvarpsstjóra að njóta nafnleyndar. Þetta kemur fram í tilkynningu frá stjórn RÚV.
Ákvörðun stjórnar Ríkisútvarpsins um að birta ekki nöfnin var sem kunnugt er kærð til úrskurðarnefndarinnar á þeim forsendum að upplýsingalög skylduðu stofnunina til að birta nöfn umsækjenda. Nú hefur verið staðfest að svo er ekki, þar sem starfsfólk RÚV er ekki talið til opinberra starfsmanna.
„Rétt er að upplýsa að sú ákvörðun stjórnar að birta ekki nöfn umsækjenda var tekin að vandlega athuguðu máli og með hagsmuni almennings í huga. Trúnaður um nöfn umsækjenda er að mati ráðgjafa í ráðningamálum mikilvægur til að hámarka gæði umsókna. Slíkur trúnaður dregur ekki úr gagnsæi umsókna og ráðningarferlisins, en eykur þvert á móti trúverðugleika þess gagnvart umsækjendum sem þurfa ekki að taka þá áhættu að starfsumsókn valdi þeim tjóni á öðrum vettvangi.“
segir í tilkynningunni.
Ákveðið var að birta ekki listann eftir ráðleggingar Capacent, sem sagði að þannig fengust líklega betri umsækjendur. það herbragð virðist ekki hafa heppnast, þar sem umsóknarfresturinn var framlengdur um eina viku.
„Úrskurðarnefnd um upplýsingamál telur ljóst að þegar litið er til almennra athugasemda sem og athugasemda að baki ákvæði 2. mgr. 7. gr. í frumvarpi því er varð að upplýsingalögum nr. 140/2012 þá taki hugtakið „opinberir starfsmenn“ samkvæmt lögunum einungis til starfsmanna stjórnvalda. Telur nefudin einsýnt að hlutafélag í eigu ríkisins eins og RÚV ohf. geti ekki talist til stjórnvalds í þeim skilningi sem byggt er á 1. mgr. 2. gr. upplýsingalaga. Þess í stað verður að leggja til grundvallar að RÚV ohf. sé einkaréttarlegur lögaðili í skilningi 2. mgr. 2. gr. laganna. Samkvæmt því tekur sérregla 2. tölul. 2. mgr. 7. gr. ekki til upplýsinga um málefui starfsmanna RÚV ohf. Afþví leiðir að réttur almennings til aðgangs að upplýsingum um hverjir hafa sótt um stöðu útvarpsstjóra RÚV ohf. getur ekki byggst á ákvæði 2. mgr. 7. gr. upplýsingalaga.“
