Þjókirkjan og önnur trúfélög þurfa ekki að greiða fasteignaskatt af kirkjum og bænahúsum, samkvæmt lögum. Ef trúfélög nytu ekki slíkrar undanþágu, næmi skatturinn 340 milljónum króna.
Þetta kemur fram í svari samgöngu – og sveitarstjórnarráðherra við fyrirspurn Andrésar Inga Jónssonar, þingmanns VG, sem spurði um fasteignamat þeirra eigna sem undanskildar væru og hver upphæðin væri sem því næmi.
Fasteignamat kirkna og safnaðarheimila er alls 21.5 milljarður, sem hefði gefið af sér 340 milljónir í fasteignaskatta, ef undanþágunnar nyti ekki við.
Safnahús eru einnig undaþegin fasteignaskatti, ef þau eru ekki rekin í ágóðaskyni. Er fasteignamat þeirra 14.8 milljarðar og væri fasteignaskatturinn af þeim 232 milljónir.
Hús erlendra ríkja og alþjóðastofnana, svo sem sendiráð, eru einnig undanþegin fasteignaskatti. Þegar slíkar fasteignir eru teknar með, er heildarfasteignamatið rétt tæpir 43 milljarðar og umreiknaður fasteignaskattur alls 640 milljónir. Athuga þarf að skatthlutföll eru breytileg eftir sveitarfélögum.
Sjá má töfluna með skiptingunni eftir eignum og sveitarfélögum hér.