Sveitarfélög á Íslandi ákveða sjálf hvernig reglum um móttöku, flokkun, og eyðingu úrgangs er háttað í sínu byggðarlagi og eru lausnirnar sem í boði eru því mismunandi.

Hver íbúi höfuðborgarsvæðisins hendir að meðaltali um 223 kílóum af úrgangi í ruslið á hverju ári og er sorp orðið að alheimsvandamáli, þar sem plastagnir finnast víðast hvar í fiski og neysluvatni, og súrnun sjávar mun stórskaða lífríki hafsins á næstu árum verði ekkert að gert.

Nú eru hugmyndir uppi í Umhverfisráðuneytinu um að leiða flokkun rusls í lög, ef marka má viðtal við Guðmund Inga Guðbrandsson, Umhverfis- og auðlindaráðherra, í fréttabréfi stéttarfélagsins Sameiki:

 „Því það er ekki nóg að sveitarfélagið setji reglur um að flokka, fólk verður að vita hvernig á að gera það og hvers vegna það sé mikilvægt. Þetta helst allt í hendur. Og það er einmitt eitt af því sem ég er að skoða núna; getum við samræmt flokkunina meira þótt ekki væri nema innan landshluta sem nýta sér sömu úrgangsþjónustu. Einnig er ég að skoða að gera flokkun á landsvísu að skyldu bæði hvað varðar einstaklinga og fyrirtæki því það er líka mjög misjafnt hvernig þau standa sig. Þetta tengist allt hringrásarkerfinu sem er eitt af verkefnum ársins hjá okkur í umhverfis- og auðlindrráðuneytinu.“