Sóley Tómasdóttir, fyrrverandi borgarfulltrúi VG, segir að Vigdís Hauksdóttir, oddviti Miðflokksins í Reykjavík, upphefji sjálfa sig með því að standa í ófrægingarherferð gagnvart starfsmanni Reykjavíkurborgar, Helgu Bjargar Ragnarsdóttur, hvers hegðun gagnvart undirmanni sínum varð til þess að Reykjavíkurborg var dæmd til þess að draga til baka veitta áminningu auk fjársektar af Héraðsdómi Reykjavíkur.

Sóley segir í stöðuuppfærslu á Facebook í morgun að Vigdís hafi ýkt og logið margsinnis um störf Helgu:

„Vigdís Hauksdóttir hélt áfram ófrægingarherferð sinni á hendur Helgu Björgu Ragnarsdóttur í morgunútvarpinu í morgun. Herferðin hefur staðið yfir óslitið frá kosningum, jafnt í fjölmiðlum sem hér á Facebook þar sem konan hefur birt tugi stöðuuppfærsla með ýkjum og lygum um störf Helgu Bjargar.“

Hvort tveggja rangt

Þá minnist hún á framgöngu Vigdísar í Morgunútvarpinu í morgun og segir hana hafa farið með rangt mál:

„Í morgun hélt Vigdís því fram að Helga Björg hefði verið dæmd fyrir óviðeigandi framkomu við starfsmann borgarinnar og að hún sjálf hefði komið honum til varnar. Hvort tveggja er rangt. Reykjavíkurborg (ekki Helga) var dæmd til að draga til baka veitta áminningu, um það eitt snérist dómurinn. Vigdís Hauksdóttir kaus samt sem áður að blása málið upp, fjalla um það sem eineltismál og vega þannig að starfsheiðri og persónu Helgu í þeim eina tilgangi að upphefja sjálfa sig á pólitískum vettvangi. Vigdís kom starfsmanninum ekki til neinna varna, enda var dómur fallinn, borgin hafði gengist við honum og uppþot Vigdísar breytti engu þar um.“

Þekkir ekki valdmörk sín

Sóleyju blöskrar framkoma Vigdísar og segir aðgerðir hennar popúlískar:

„Sem fyrrverandi forseti borgarstjórnar blöskrar mér framkoma Vigdísar í garð embættismanna og tek undir álit siðanefndar Sambands íslenskra sveitarfélaga þar sem sem framganga Vigdísar er harðlega átalin. Það er með öllu óbærilegt að sjá hæft og vandað starfsfólk hrökklast úr ráðhúsinu vegna popúlískra aðgerða stjórnmálafólks sem þekkir ekki valdmörk sín. Þetta er bara eitt dæmi af mörgum.“

Reykjavíkurborg var dæmd til greiðslu sektar að upphæð 1,5 milljónar króna vegna hegðunar Helgu Bjargar í garð undirmanns síns.  Í niðurstöðu dómsins eru stjórnunarhættir Helgu Bjargar gagnrýndir harðlega og sá dómari í málinu ástæðu til þess að minna Helgu á, að undirmenn hennar væru ekki „dýr í hringleikahúsi yfirmanna“.

Sjá nánar: Helga Björg sögð koma fram við undirmann eins og „dýr í hringleikahúsi“ – Starfar enn hjá Reykjavíkurborg – „Einörð og fylgin sér“