„Desemberuppbótin er persónuuppbót og á því ekki vera neitt hlutfall af launum eða vera í samræmi við hvort laun eru há eða lág,“ segir Björn Leví Gunnarsson, þingmaður Pírata. Samkvæmt launaseðli hans er desemberuppbótin, eða það sem stundum er kallað jólabónus, 181.050 kr.

Ekki virðist hægt að nálgast upplýsingar um þetta á netinu, hvorki tókst blaðamanni það né Birni sjálfum. Á vefsíðu kjararáðs er vísað til sérstakrar undirsíðu á vef Alþingis um þessi kjör en sú síða liggur niðri.

Ákvörðun um desemberuppbót og önnur launakjör þingmanna var ákvörðuð af Kjararáði sem nú hefur verið lagt niður og hlutverk þess fært inn í fjármálaráðuneytið. Lög um framtíðarskipan kjaramála embættismanna og kjörinna fulltrúa hafa hins vegar ekki litið dagsins ljós.

Björn segist telja uppbótina allt of háa. „Ég átta mig ekki á því hvernig þetta er reiknað út. Þetta er í rauninni alveg fáránlegt.“

Desemberuppbót er föst upphæð sem oftast er ákvörðuð í samningum verkalýðsfélaga við viðsemjendur sína og er ekki reiknuð út frá launatölu. Þannig er desemberuppbót samkvæmt kjarasamningum VR 89.000 kr. miðað við fullt starf. Sömu upphæð hefur Efling samið um fyrir sína umbjóðendur á almennum markaði, Reykjavíkurborg og hjúkrunarheimilum ríkisins, en félagar í Eflingu sem starfa hjá öðrum sveitarfélögum en Reykjavíkurborg fá hins vegar 113.000 kr. í desemberuppbót.

Í fljótu bragði séð virðast engar stéttir nálgast desemberuppbót þingmanna. Björn Leví telur að desemberuppbót þingmanna ætti ekki að vera hærri en gengur og gerist almennt í samfélaginu, engar forsendur séu fyrir svo miklu hærri uppbót.