Björgvin G. Sigurðsson skrifar: Alþingiskosningarnar í lok október skiluðu vissulega fleiri þingflokkum en nokkru sinni fyrr og auknum óstöðugleika á stjórnmálasviðinu. Hinsvegar var samhljómur með flokkunum um margt. Stórum átakamálum skyldi vikið til hliðar og forgangsraðar í þágu uppbyggingar innviða samfélagsins. Aukinni samneyslu og velferð.
Allir lofuðu flokkarnir miklum og auknum fjármunum til heilbrigðis- og menntamála. Þeir sem mest fóru munu aldrei geta staðið við stóru orðin en áherslurnar voru meira og minna þær sömu á þessum sviðum. Mikill meirihluti landsmanna kallar eftir betra og þéttara velferðarneti, sérstaklega á sviði heilbrigðismála og bættum hag þeirra sem lifa á lífeyri.
Í þessu samhengi er mikilvægt að endurskipuleggja hlutverk heilbrigðisstofnana hringinn í kringum landið. Fá þeim aukin og skýr hlutverk í heilbrigðisþjónustunni og tryggja þeim fjármuni til þess að rækja það hluverk. Eftir því sem heilbrigðisþjónustan er öflugri heima í héraði er álaginu á kerfið jafnað, þjónustan bætt og færð nær íbúum landsins.
Því er það skynsamleg afstaða að setja stærstu ágreiningsefni stjórnmálanna til hliðar um skeið og mynda stjórn um stóru málin. Uppbyggingu almannaþjónustu sem svarar kröfum og kalli tímans. Þetta á ekki síst við vegna aukins þrýstings á vegi og velferðarkerfi landsins vegna aukins ferðamannafjölda.
Stjórnvöld og ný ríkisstjórn þurfa að styðja duglega við ferðaþjónustuna á næstu misserum. Vaxtaverkir einkenna nú greinina eftir fádæma uppbyggingu á fáum árum. Nú þarf að leggja þessari stærstu og verðmætustu atvinnugrein landsins lið við að finna jafnvægi og stöðugleika. Það er meðal annars gert með átaki í samgöngu- og vegamálum sem skilar bæði ferðafólki og erlendum gestum, sem og okkur sem hér búum, auknu öryggi á vegum úti.
Mesta öryggismálið er breikkun og tvöföldun fjölfarinna vega. Aðskilnaður akreina skiptir mestu máli. Einungis þannig má svo gott sem útrýma alvarlegum umferðarslysum á þyngstu vegunum, sem ná nú frá Reykjavíkursvæðinu vestur í Borgarfjörð og austur í Mýrdal.
