Veiðigjöld á landaðan afla í Bolungavík munu þrefaldast að krónutölu milli fiskveiðiára samkvæmt samantekt sem Jón Páll Hreinsson, bæjarstjóri í Bolungavík hefur undir höndum. Á síðasta fiskveiðiári 2016/17 var 15 þúsund tonnum af bolfiski og rækju landað í Bolungavíkurhöfn, þar af 10 þúsund tonnum af þorski. Áætlað greitt veiðigjald var um 100 milljónir króna. Á yfirstandandi fiskveiðiári stefnir í að upphæðin hækki í 311 milljónir króna miðað við sama landaðan afla.
Það er einkum tvennt sem hefur breyst í forsendunum. Það fyrra er að veiðigjaldið er nú verulega hærra en á síðasta ár. Fyrir hvert kg af þorski verður veiðigjaldið 23 kr nú en voru 11 kr á síðasta fiskveiðiári. Hitt sem hefur breyst er að fallinn er niður afsláttur af álögðu veiðigjaldi sem útgerðir hafa fengið vegna kaupa á fiskveiðiheimildum. Hækkun veiðigjaldsins er vegna góðrar afkomu á árinu 2015, sem var mun betri en árið 2014. Hækkun veiðigjaldsins vegna betri afkomu í þorski og ýsu skýrir 140 milljónir króna af hækkuninni og 54 milljónir króna skýrast af því að afslátturinn er fallinn niður.
Jón Páll Hreinsson, bæjarstjóri segir í samtali við blaðið Vestfirðir að hann viti ekki um neinn sem andmæli því að ríkið innheimti veiðigjald en hann hefur áhyggjur af því að gjaldið sé of íþyngjandi fyrir útgerðina miðað við rekstrarforsendur um þessar mundir. Afkoma í sjávarútvegi breytist mjög hratt og ef öll framlegðin fari í veiðigjaldið gæti það leitt til samþjöppunar veiðiheimilda. Jón Páll bendir á að síðustu ár hafi veiðiheimildir leitað inn á höfuðborgarsvæðið og hlutur þess í aflaheimildunum hefur vaxið. Þá minnir Jón Páll Hreinsson á tillögu í skýrslu um stefnumótun í fiskeldi þess efnis að hluti veiðigjalds á greinina renni til sveitarfélagsins þar sem starfsemi er. Segir Jón Páll það eðlilegt að hluti veiðigjaldsins í sjávarútvegi renni til sveitarfélaga.
