Þórarinn Þórarinsson, pistlahöfundur Fréttablaðsins, fer mikinn í bakþönkum blaðsins í dag þar sem hann lætur virka í athugasemdum heyra það.

Þar gerir Þórarinn að umtalsefni málefni ungs manns, Mahad Abib Mahamud, sem kom hingað til lands frá Noregi fyrir skemmstu. Mahad var sviptur norskum ríkisborgararétt eftir að hafa búið í landinu í sautján ár. Það sem Mahad vann sér til saka var að segjast vera frá Sómalíu þegar flest benti til þess að hann væri frá Djíbútí.

Þórarinn segist ekkert þekkja til mannsins – eða málsins yfir höfuð – og segist þar af leiðandi ekki ætla að hafa neina skoðun á honum sem manneskju.

„Óþverralýðurinn sem rottar sig saman í athugasemdakerfum vefmiðlanna veit sjálfsagt jafn lítið og ég. Sennilega minna enda benda athugasemdir þeirra iðulega til þess að þau hafi ekki lesið þær fréttir sem þau gjamma undir. Kunni í það minnsta alls ekki að lesa sér til gagns,“ segir Þórarinn sem nefnir tvö dæmi úr frétt DV.is um mál Mahads. Þau eru svohljóðandi:

Því í fjandanum var þessum ekki snúið við á punktinum og til Noregs aftur, orðinn kjaftbit.“

 

Maðurinn er greinilega einhver hrotti eða glæpon, annars hefðu Norðmenn aldrei úthýst manni með ríkisborgararétt.

„Heimskan, illskan og stafsetningin (þessi ótæka og snarbrjálaða) eru hin heilaga þrenning virkra í athugasemdum. Helsti ókosturinn við internetið er að með því fengu allir rödd. Sumir hafa bara því miður ekkert að segja, en þurfa ekki lengur að þegja, og æla í staðinn svartasta galli sálna sinn yfir almenning,“ segir Þórarinn sem er þekktur fyrir flest annað en að liggja á skoðunum sínum.
Í grein sinni bætir hann við að í athugasemdakerfunum beita „heimskustu“ 0,01 prósent þjóðarinnar okkur hin, 99,99 prósentin, „andlegu og félagslegu ofbeldi.“

„Eiga þessir grunnhyggnu, illa þenkjandi og enn verr skrifandi alvitringar ekki aðstandendur sem geta bent þeim á að hætta þessu. Eða vísað þeim á viðeigandi stofnun? Helst áður en þessi pistill fer á vefinn ;)“