„Ég er bláeygur og barnalegur bjáni. Maður sem hefur ekki opnað augun fyrir raunveruleikanum, heldur lifir í einhvers konar sápukúlu. Og gott ef ég er ekki á móti Íslendingum sem búa við skort, eru fátækir. Allt þetta, og meira til, má lesa út úr þeirri orðræðu sem verður sífellt háværari, nefnilega að þau sem telja að Ísland eigi að leggja meira af mörkum til að aðstoða flóttafólk og hælisleitendur séu á móti Íslendingum sem lifa við fátækt.“
Svona hefst harðorður pistill Kolbeins Óttarsonar Proppé þingmanns Vinstri grænna sem hann skrifar á Kjarnann í dag. Segir Kolbeinn það vera bull og lýðskrum að halda því fram að þeir sem telji að Ísland eigi að leggja meira af mörkum til að aðstoða flóttafólk og hælisleitendur séu á móti Íslendingum sem lifa við fátækt. Þetta sé ein af stærstu lygum samtímans sem sett sé fram til að spila á tilfinningar fólks:
Ég hef fengið meira en nóg af þeim sem láta eins og staða flóttafólks og hælisleitenda hafi eitthvað að gera með stöðu fátækra á Íslandi. Hættiði þessu rugli. Þetta er mannfjandsamleg skoðun og stórhættuleg, því hún gerir ekkert nema viðhalda fátækt,
segir Kolbeinn á Fésbók. Segir hann í pistlinum að ef einhver segi þér að einhver tenging sé á milli þess að við sem samfélag eyðum í aðstoð við flóttafólk og hælisleitendur og þess að við eyðum ekki nægu fjármagni í húsnæði, félagsaðstoð og stuðning við fátæka Íslendinga, þá sé viðkomandi að ljúga að þér. Það tengist því jafn mikið og því sem stjórnarráðið eyði í ljósritunarvél og malbikun í Berufjarðarbotni. Kolbeinn segir að sá sem haldi þessu fram hafi hins vegar rétt fyrir sér þegar komi að fátækt landsmanna því það eigi ekki líðast að fólk lifi á lúsarlaunum og enn lægri bótum:
Við eigum að berjast með kjafti og klóm fyrir því að allir hafi aðgang að mannsæmandi húsnæði, eigi í sig og á og meira en það; hafi tóm til að sinna sjálfum sér og sínum, ekki bara skrimta. En þetta hefur nákvæmlega ekkert að gera með flóttafólk og hælisleitendur, ekki neitt.
