Gústaf Níelsson og Gunnlaugur Ingvarsson ásamt fleirum hafa stofnan nýjan stjórnmálaflokk, Frelsisflokkinn og opnað vefsíðuna frelsisflokkur.is. Flokkurinn er klofningur úr Íslensku Þjóðfylkingunni, en þeir Gústaf og Gunnlaugur voru efstu menn á lista ÍÞ fyrir síðustu kosningar en hættu skyndlega í flokknum og drógu framboð sitt til baka tveimur vikum fyrir kosningar vegna deilna innan flokksins. ÍÞ var áður Hægri grænir, náði flokkurinn mest rúmlega 2% fylgi í skoðanakönnunum.

Sjá einnig: Hægri Grænir renna inn í Þjóðfylkinguna: Hafna „hugmyndinni um fjölmenningu“

Sjá einnig: Íslenska þjóðfylkingin ríflega þrefaldar fylgi sitt

Fram kemur á heimasíðu Frelsisflokksins að stefna hans sé að „standa vörð um íslenskt fullveldi og þjóðfrelsi íslensku þjóðarinnar“:

Flokkurinn vill varðveita og efla íslenska þjóðmenningu og tungu. Útlendingar sem vilja flytjast til landsins á lömætum forsendum aðlagist íslensku samfélagi. Frelsisflokkurinn styður þjóðleg borgaraleg viðhorf og kristna trú og gildi. Frelsisflokkurinn tekur almannahagsmuni framyfir sérhagsmuni. Þjóðríkjahugsjónin og frelsi þjóða er ein af grunnstefnu Flokksins.

Lögð er sérstök áhersla á öryggismál og segir í stefnu flokksins að „óskorað fullveldisyfirráð yfir landamærum og landhelgi íslands sé hornsteinn þjóðríkjahugsjónarinnar.“:

„Frelsisflokkurinn styður frjálsa viðskiptasamninga frjálsra þjóða um heim allan á jafnréttisgrundvelli til hagsbóta öllum þjóðríkjum. Flokkurinn berst því gegn hinni óheftu alþjóðavæðingu sem stórskaðað hefur hagsmuni og lífsafkomu íbúa þjóðríkja víða um heim.“

Gunnlaugur er formaður flokksins, aðrir í stjórn eru Gústaf Níelsson, Ágúst Örn Gíslason, Einar Hjaltason, Höskuldur Geir Erlingsson, Gunnar Andri Sigtryggsson, Guðmundur Jónas Kristjánsson, María Magnúsdóttir og Ægir Óskar Hallgrímsson.