Garðabær hefur eignast jörðina Vífilsstaði, skrifuðu Benedikt Jóhannesson fjármálaráðherra og Gunnar Einarsson, bæjarstjóri Garðabæjar undir samning þess efnis í gær í golfskála GKG. Um er að ræða 202,4 hektara land í kringum Vífilsstaðaspítala, núverandi golfvallarsvæði GKG, friðland í Vífilsstaðahrauni, Rjúpnahæð á móts við Kjóavelli sem og svæði austan Vífilsstaða. Húseignir ríkisins eru undanskildar samningnum, en samkvæmt Morgunblaðinu verða gerðir lóðasamningar um eignirnar. Kaupverðið er 558,6 milljónir kr. 99,3 milljónir voru greiddar við undirritun samningsins og greiða á eftirstöðvarnar fyrir aprílmánuð 2025.
Landið var áður í umsjón Landspítalans en fjármálaráðuneytið tók lóðina til sín árið 2014, gagnrýndi Páll Matthíasson, forstjóri Landspítalans harðlega þá ákvörðun á sínum tíma:
Landspítali mótmælir harðlega að ráðuneytið flytji einhliða og án umræðu umsjón með landinu frá spítalanum. Það vakna upp spurningar hvers vegna beitt er svo sértækri aðgerð til þess að skerða land Landspítala á Vífilsstöðum,
sagði Páll í bréfi dagsett 23.desember 2014. Sagði hann það kröfu Landspítala að ákvörðunin yrði afturkölluð og sett yrði af stað stefnumótun til langrar framtíðar um notkun landsins til heilbrigðisþjónustu, en staðsetningin hefur verið nefnd sem hugsanlegur framtíðarstaður nýs Landspítala. Fréttablaðið í dag greinir frá því að Páll sé enn ósáttur:
Athugasemdir Landspítala sneru að því að þarna var um að ræða land sem horft var til fyrir uppbyggingu spítalans til framtíðar,
sagði Páll. Nú er fyrirhugað að efna til samkeppni um skipulag á svæðinu en í tillögu að nýju aðalskipulagi Garðabæjar er gert ráð fyrir að svæði Vetrarmýrar, Hnoðraholts og Vífilsstaða verði eitt skólasvæði með 1200-1500 íbúðum.
