Umhverfisstofnun tilkynnti United Silicon að stöðva þyrfti starfsemi verksmiðju fyrirtækisins í Helguvík fyrir páska þar sem möguleiki væri á því að hættuleg efni á borð við maurasýru og ediksýru menguðu andrúmsloftið í kringum verksmiðjuna. Hætt var við að stöðva starfsemina í kjölfar fundar með forsvarsmönnum fyrirtækisins. Greint er frá þessu í Fréttablaðinu í dag. Var sú ákvörðun tekin eftir að stjórn United Silicon ákvað að ræsa ekki ljósbogaofn verksmiðjunnar í næsta óvænta ofnstoppi sem myndi vara lengur en í klukkustund.

Verksmiðjan er nú nokkuð skemmd í kjölfar eldsvoða aðfaranótt þriðjudags og þar sem starfsemin er óheimil samkvæmt skilyrðum Umhverfisstofnunar er ljóst að henni verður hætt í bili, en framtíðin er óljós.

Björt Ólafsdóttir umhverfis- og auðlindaráðherra sagði á Fésbók eftir að fréttir bárust af brunanum að nú væri nóg komið og það þurfi að loka kísilmálverksmiðjunni í Helguvík á meðan eftirfarandi þættir eru kannaðir til fullnustu:

Í fyrsta lagi, afhverju íbúar í grennd við hana upplifa einkenni sem að mengunarmælingar geta ekki útskýrt,

Í öðru lagi þarf að kanna vinnuaðstæður sérstaklega. Á sameiginlegum fundi fyrir umhverfis og samgöngunefnd lýsti forstjórinn því, aðspurður um hugsanlega hækkun á Arsen í andrúmslofti, að starfsmennn væru að opna út vegna þess að þeim væri svo heitt. Þessvegna losaðist út mengun beint af gólfinu sem að væri ekki búin að fara í gegn um reykhreinsikerfi. Hvað komast þessir sömu starfsmenn í mikla snertingu við alls konar óæskileg efni?

Í þriðja lagi þarf að kanna fjármögnun. Það er ljóst á öllu að fyrirtækið þarf fjármagn. Hverjir eru að bjóða það fram núna? Ég ætla rétt að vona að það séu ekki sameiginlegir sjóðir þeirra sömu landsmanna og ýta á að fyrirtækið loki.