Hagstofa Íslands gaf í dag út útreikninga um meðalrekstrarkostnað á nemanda í öllum grunnskólum sem sveitarfélögin reka í dag. Það er gert í samræmi við 2. og 3. mgr. 3. gr. reglugerðar um ákvörðun framlaga úr sveitarsjóði til sjálfstætt rekinna grunnskóla.
Í reglugerðinni segir:
„Útreikningur Hagstofu Íslands skv. 1. mgr. vegna komandi skólaárs skal liggja fyrir í september ár hvert. Útreikningur skal byggður á ársreikningum sveitarfélaga fyrir liðið ár, að teknu tilliti til verðlagsbreytinga til þess dags sem útreikningur er gerður. Verðlagsbreytingar skulu taka mið af almennum launahækkunum starfsmanna grunnskóla og breytingum á vísitölu neysluverðs að teknu tilliti til vægis hvors þáttar fyrir sig í rekstrarkostnaði grunnskólanna.
Hagstofa Íslands tekur saman 90 dögum eftir að viðmiðunarmánuði lýkur og birtir fimmta dags hvers mánaðar, á tímabilinu frá október og fram til ágúst, framreiknað framlag skv. 1. mgr. Við framreikning þess skal tekið tillit til verðlagsbreytinga sem orðið hafa frá ákvörðun framlags skv. 1. mgr., þ.e. almennra launahækkana starfsmanna grunnskóla og breytinga á vísitölu neysluverðs, miðað við vægi hvors þáttar í rekstrarkostnaði grunnskóla.“
Þessi reglugerð var sett til bráðabirgða og gildir til 30. september á þessu ári.
Árið 2015 var meðalrekstrarkostnaður á hvern grunnskólanemanda 1.651.002 krónur en megin meðalverðbreyting rekstrarkostnaðar frá 2015 til apríl 2017 er áætluð 8,7%.
Því reiknast Hagstofunni til að árlegur rekstrarkostnaður á hvern nemanda í grunnskólum reknum af sveitarfélögunum sé 1.793.908 krónur í apríl á þessu ári.
