Guðni Th. Jóhannesson forseti Íslands sendi í dag samúðarkveðju fyrir hönd íslensku þjóðarinnar til Vladímírs Pútsíns forseta Rússlands vegna hryðjuverksins í St. Pétursborg á mánudaginn.

Í kveðju Guðna segir að hugur Íslendinga sé hjá fjölskyldum og vinum þeirra sem týndu lífi í árásinni og þeirra sem glíma við afleiðingar hennar á sjúkrahúsum. Segir jafnframt að brýnt sé að þjóðir heims taki höndum saman í baráttunni gegn hryðjuverkum og leiti hvarvetna friðsamlegra lausna.

Fjórtán létust í árásinni og meira en 50 særðust í sprengingu í neðanjarðarlest. Sex hafa verið handteknir vegna málsins.