Sjómenn samþykktu naumlega kjarasamning við Samtök fyrirtækja í sjávarútvegi. Alls voru 623 þeirra sem greiddu atkvæði samþykkir nýjum samningi en 558 á móti. Átta kjörseðlar voru auðir og ógildir. Þar með er ljóst að 52,4% þeirra sem greiddu atkvæði voru samþykkir en 46,9% vildu hafna samningnum.

Kjörsókn var 53,7%. Alls voru 2.214 á kjörskrá en 1.189 greiddu atkvæði.

Samningar voru undirritaðir aðfaranótt laugardagsins og atkvæðagreiðsla um þá fór fram í gær og í dag.

Með samþykkt nýs kjarasamnings er rúmlega tveggja mánaða sjómannaverkfalli er lokið. Mörgum er eflaust létt enda var áhrifa verkfallsins farið að gæta víða í samfélaginu, ekki einungis í sjávarútvegnum heldur ýmsum þjónustugreinum honum tengdum. Nú bíður það verkefni að koma flota og fiskvinnslu aftur í gang.

Meðal annars stendur loðnuvertíð fyrir dyrum. Óveiddur er 196 þúsund tonna loðnukvóti íslenskra skipa.

Gríðarlega mikið lá undir að samningar yrðu samþykktir. Vísast hefði orðið pólitískt uppnám hefðu sjómenn hafnað þeim eins og nærri varð raunin. Hitt er svo annað að menn virðast hafa verið þvingaðir til samninga undir hótunum, sjá nánar nýjasta pistil Orðsins á götunni hér á Eyjunni. Hann má lesa með því að smella hér.