Símarnir eru að stærstum hluta framleiddir í Kína en eins og kunnugt er hefur Trump tilkynnt um 104 prósenta toll á Kína. Þetta gerðist í kjölfar þess að Kína setti 34 prósenta toll á Bandaríkin. Til útskýringar snýst tollastríð um að lönd leggja aukaskatta, eða tolla, á vörur sem eru fluttar inn frá öðrum löndum. Ef til dæmis Bandaríkin leggja toll á hluti frá Kína (eða öfugt), þá hækkar framleiðslu- eða innflutningskostnaður þeirra vara.
Aðfangakeðja Apple vegna framleiðslu fyrirtækisins á iPhone er býsna flókin; skjárinn kemur frá Suður-Kóreu, örgjörvinn frá Taívan, myndavélin frá Japan og rafhlaðan frá Kína svo dæmi séu tekin. Og til að framleiða þessa hluti þarf til dæmis liþíum, blý og kóbalt.
Dan Ives, yfirmaður tæknirannsókna hjá fjármálaþjónustufyrirtækinu Wedbush Securities, segist í samtali við CNN hafa litla trú á því að tollastríðið leiði til þess að fjölmörg störf komi „heim til Bandaríkjanna“ eins og Donald Trump Bandaríkjaforseti hefur reynt að færa rök fyrir.
Telur Dan að iPhone-símar framleiddir í Bandaríkjunum gætu kostað meira en þrefalt núverandi verð sem er um þúsund dollarar. Til að hægt sé að færa framleiðsluna alfarið til Bandaríkjanna þurfi að endurskapa hið mjög svo flókna framleiðslukerfi sem þegar er til staðar í Asíu. Það eitt og sér gæti tekið mörg ár.
Hlutabréfaverð í Apple hefur lækkað skarpt eftir að Trump hóf tollastríðið, eða um 25% síðustu vikurnar. Birgðakeðja Apple er mjög háð Kína og Taívan og eru um 90% af iPhone-símum settir saman í Kína.
Í frétt CNN kemur fram að tæknigreiningaraðilar séu almennt sammála um að iPhone muni hækka í verði, en spurningin er bara hvað mikið. Þetta muni gerast þótt birgðakeðjan haldist óbreytt. Rosenblatt Securities, fjárfestingabanki í New York, heldur því til dæmis fram að iPhone gæti orðið 43% dýrari ef Apple ákveður að velta öllum aukakostnaði vegna tollanna á neytendur.
Í frétt Mail Online er til dæmis bent á að Bretland hafi ekki ákveðið að leggja hefndartolla á Bandaríkin en samt sem áður sé talið að verðhækkanir muni skila sér til Bretlands og annarra landa. Þannig sé talið ólíklegt að Tim Cook, forstjóri Apple, muni kæra sig um að hafa mismunandi verð í mismunandi löndum. Þannig muni hækkanir í Bandaríkjunum einnig skila sér til Bretlands og annarra landa.
