Adam Ægir Pálsson, leikmaður Perugia á Ítalíu á láni frá Val, var í áhugaverðu spjalli í nýjasta þætti af Íþróttavikunni á 433.is og var þar farið um víðan völl.

Sem fyrr segir er Adam samningsbundinn Val og hann fylgdist vel með sínum mönnum eftir að hann hélt til Ítalíu um mitt sumar.

„Ég horfi auðvitað á alla leiki hjá Val. Auðvitað var þetta upp og niður en stundum er erfitt að spila leiki þegar þú veist hvernig niðurstaðan á sumrinu verður. Það er lítið að marka suma af þessum leikjum. En þeir sýndu á móti ÍA í síðasta leiknum að það er gríðarlegt efni þarna,“ sagði Adam en í þeim leik vann Valur stórsigur og tryggði Evrópusæti.

„Mér finnst umræðan um Val oft svolítið skrýtin, eins og það sé allt í fokki. En stundum er þetta svona, ég held að á næsta ári komum við enn sterkari til baka. Ég hef ekki trú á að það verði miklar breytingar. Við erum með gríðarlega góðan hóp og ef eitthvað er verður bara bætt í og vonandi verður Valur mættur aftur á toppinn sem fyrst.“

Adam var í viðtalinu einnig spurður út í eigin framtíð en sem stendur veit hann ekki hvort hann snúi aftur til Vals að lánsdvöl hjá Perugia lokinni næsta sumar. Honum stendur til boða að vera áfram á Ítalíu að sögn.

„Ég tek bara einn dag í einu og þarf fyrst að sjá hvaða möguleiki er bestur fyrir mig. Að einhverju leyti er ég orðinn smá þreyttur á að vera ekki lykilmaður í einhverju liði. En þeir hafa alltaf sagt við mig að þeir sjái mig sem leikmann Perugia til lengri tíma. Ég verð að taka ákvörðun þegar nær dregur en eins og staðan er er ég gríðarlega sáttur.“

Viðtalið í heild er í spilaranum.