Kolbrún Bergþórsdóttir, landsþekktur blaðamaður Morgunblaðsins, hefur samúð með Þórunni Sveinbjarnardóttur, forseta Alþingis, fyrir að hafa misst þolinmæðina og tautað fúkyrði í garð stjórnarandstöðunnar fyrir munni sér. Orðrétt sagði Þórunn, sem frægt varð: „Ég er komin með nóg. Djöfulsins, helvítis, andskotans pakk.“

Kolbrún hefur skilning á þessu framferði í ljósi þess hvað stjórnarandstaðan sé leiðinleg. Hún segir í sunnudagspistli sínum í Morgunblaðinu:

„Pistlahöfundur hefur ríka samúð með Þórunni í þessari stöðu. Það getur ekki verið skemmtilegt hlutskipti að vera skyldaður til að hlusta á stjórnarandstöðu landsins. Pistlahöfundi finnst hún heyra alltof mikið frá stjórnarandstöðunni og eiginlega allt byggist þar á reiði, niðurrifi og nöldri. Það er niðurdrepandi að hlusta á endalaust röfl einstaklinga sem eru óskaplega ósáttir við hlutskipti sitt og virðast hafa gert það að markmiði í lífi sínu að einblína á slæmu hliðarnar á öllum málum. Pistlahöfundur þolir það ekki vel og getur vel sett sig í spor Þórunnar sem starfs síns vegna á enga flóttaleið frá þessu neikvæða málæði stjórnarandstöðunnar.“

Kolbrún segir að stjórnarandstaðan sé gjörsneydd umburðarlyndi og fyrirgefningaranda eins og þó ætti að tíðkast þegar nær dregur jólum. Samt segist sumir leiðtogar hennar leggja mikið upp úr kristnum gildum. Hún minnir líka á að Þórunn hafi einlæglega beðist afsökunar á framkomu sinni:

„Forseti þingsins baðst einlæglega afsökunar á blóti sínu. Eins og hinn ágæti forsætisráðherra benti stjórnarandstöðunni síðan á þá er betra að fólk sé nógu stórt til að geta tekið afsökunarbeiðni gilda. Sú sem þetta skrifar lærði einmitt snemma að ef einhver biður mann afsökunar þá tekur maður því og lætur málið snarlega niður falla. Sá góði boðskapur á ekki upp á pallborðið hjá stjórnarandstöðunni fremur en annað sem jákvætt er. Áfram skal nöldrað! virðist vera kjörorð stjórnarandstöðu þessa lands.“