Ása Guðbjörg Ellerup sótti um skilnað frá eiginmanni sínum, Rex Heuermann, sex dögum eftir að hann var handtekinn og ákærður fyrir raðmorð í New York. Skilnaðurinn er ekki frágenginn, en á því rúma ári síðan Heuermann var handtekinn hefur hann verið ákærður fyrir morð alls sex kvenna. Enn er talið líklegt að ákærurnar verði fleiri.

DailyMail greinir nú frá því að Ása hafi gefið frá sér óvænta yfirlýsingu í vikunni. Þrátt fyrir þau sönnunargögn ákæruvaldsins sem þegar hafa verið opinberuð, svo sem skjal sem fannst á hörðum disk í eigu Heuermann þar sem má finna leiðbeiningar fyrir morðingja, trúir Ása enn að maður sinn sé saklaus.

Heuermann mætti í undirbúningsþinghald í gær í Suffolk sýslu. Við tilefnið sagði lögmaður Ásu, Robert Macedonio:

„Handtaka Rex og ásakanirnar gegn honum hafa rústað lífi fjölskyldunnar eins og þau þekktu það. Eftir tæpa þrjá áratugi með manni sínum á hún erfitt með að ímynda sér að hann sé sekur um þá hrottalegu glæpi sem á hann eru bornir. Raunin er sú að þó hún voni það besta þarf hún að undirbúa sig undir það versta, og hún ætlar áfram að bíða með að fella sinn dóm þar til yfir lýkur.“

Ása hefur, ásamt fullorðnum syni sínum, flúið ágang fjölmiðla og annarra og býr nú í Suður-Karólínu þar sem fjölskyldan á fasteign. Hún mætti ekki í dómsal í gær.

Heuermann er sagður hafa verið hinn hressasti í gær. Hann talaði ekki við nokkurn mann en er sagður hafa glott við og við. Verjendur hans munu fá um 120 terabæt af gögnum sem lögregla fann á raftækjum í eigu Heuermann. Næsta þinghald verður í desember en dómari í málinu vonast til að þá sé hægt að velja dagsetningu fyrir aðalmeðferð.

Lögmaður Heuermann greindi frá því að skjólstæðingur hans sé nú í einangrun í fangelsinu. Lögregla segi að það sé til að tryggja öryggi hans, en verjandinn telur þær áhyggjur ástæðulausar.

Heuermann var ákærður fyrir morð þriggja kvenna rétt eftir að hann var handtekinn. Fjórða konan bættist við í janúar og svo tvær til viðbótar í júní.