Dómur var kveðinn upp yfir Alberti Guðmundssyni, atvinnumanni í knattspyrnu, við Héraðsdóm Reykjavíkur, laust fyrir kl. 13 í dag.
Albert var ákærður fyrir nauðgun með því að hafa haft önnur kynferðismök en samræði við konu, án hennar samþykkis og að hafa beitt hana nauðung við kynferðislega athöfn sem ekki var nánar tilgreind í nafnhreinsaðri ákæru héraðssaksóknara. Atvikið átti sér stað sumarið 2023 og brotaþoli kærði Albert til lögreglu.
Lögregla sendi málið til héraðssaksóknara að lokinni rannsókn en embættið felldi málið niður. Sú ákvörðun var kærð til ríkissaksóknara sem gerði héraðssaksóknara að ákæra í málinu.
Þinghald í máli Alberts var lokað en Albert var sjálfur fjarstaddur, á Ítalíu, en þar leikur hann með úrvalsdeildarliðinu Fiorentina. Þar sem þinghald var lokað var dómurinn kveðinn upp fyrir luktum dyrum.
Niðurstaða Héraðsdóms Reykjavíkur var að Albert er sýknaður. Jóhannes Rúnar Jóhannsson héraðsdómari kvað upp dóminn.
Saksóknari í málinu, Arnþrúður Þórarinsdóttir, vildi ekki tjá sig um dóminn er DV hafði samband við hana. Það er ríkisssaksóknari sem tekur ákvörðun um hvort máli er áfrýjað til Landsréttar og gat Arnþrúður því ekki tjáð sig neitt um það. Hún vildi ekki svara því hvort dómurinn hefði komið henni á óvart en sagðist núna fara í að kynna sér forsendur hans.
Arnþrúður upplýsti DV jafnframt um það að dómurinn verður birtur um kl. 16 í dag. DV mun þá greina frá efni hans.
Verjandi Alberts Guðmundssonar, Vilhjálmur H. Vilhjálmsson, segir í samtali við Vísir.is, að niðurstaðan sé lögfræðilega rétt. „Þetta er ítarlegur og vel rökstuddur dómur, Við fögnum þessari niðurstöðu,“ segir Vilhjálmur.
Vilhjálmur segir að rökstuðningur dómsins sé yfir tuttugu blaðsíður. Þar komi fram að framburður Alberts hafi verið trúverðugur.
Vilhjálmur segist efast um að ríkissaksóknari áfrýji niðurstöðunni til Landsréttar, miðað við rökstuðning dómsins.
Eva B. Helgadóttir, lögmaður konunnar sem kærði Albert, segir í samtali við Vísir.is að niðurstaða dómsins „breyti engu um upplifun brotaþola af þessu kvöldi eða af samskiptum við ákærða.“
Hún segir að erfitt sé fyrir brotaþola að fara hina lögformlegu leið og ennfremur: „Mér finnst brotaþoli hafa sýnt styrk.“
Eva bendir jafnframt á að það væri í takt við ákvörðun ríkissaksóknara um að ákæra skyldi í málinu ef tekin yrði ákvörðun um að áfrýja málinu til Landsréttar, en eins og áður segir liggur sú ákvörðun hjá ríkissaksóknara.
