Líf knattspyrnumanna er ekki alltaf dans á rósum og hægt er að spyrja fyrrum miðjumanninn Steve Sidwell.

Sidwell glímdi við gríðarlega erfið bakmeiðsli á sínum tíma en hann er fyrrum leikmaður Chelsea, Aston Villa, Fulham, Stoke og Reading.

Sidwell endaði ferilinn hjá Brighton árið 2018 en hann var þá 35 ára gamall en vonaðist eftir því að spila lengur.

Meiðsli komu í veg fyrir það en Sidwell fór í tvær aðgerðir vegna bakmeiðsla og ákvað að lokum að segja skilið við boltann.

,,Ég var á síðasta samningsári mínu hjá Brighton. Ég þurfti á aðgerð á hrygg að halda í september. Ég flýtti endurkomunni eins mikið og ég gat en aftur meiddist stuttu seinna,“ sagði Sidwell.

,,Lífið varð allt í einu gríðarlega erfitt fyrir mig og fjölskylduna. Ég var svo slæmur í bakinu, ég gat ekki hjálpað litlu stelpunni minni úr rúminu eða spilað fótbolta í garðinum.“

,,Ég ákvað að lokum að fara í aðra aðgerð og fékk þessi skilaboð frá lækninum: ‘´Ég get komið þér aftur á völlinn en næstu tíu eða tuttugu ár þá þarftu að passa verulega upp á heilsuna.’

,,Ég man eftir því að hafa brotnað niður, ég hágrét ásamt eiginkonunni. Þar ákvað ég að þetta væri komið gott.“