Hælisleitandi í Þýskalandi hefur viðurkennt að hafa nauðgað 19 ára gamalli konu. Sagðist hann fyrir dómi hafa nauðgað konunni af því hann „langaði til þess.“

Þetta hefur Daily Mail eftir þýskum fjölmiðlum.

Þar kemur fram að maðurinn hefur áður verið dæmdur fyrir kynferðisbrot gegn börnum.

Maðurinn, sem hafði flúið til Þýskalands frá Afganistan, er aðeins nefndur Sefatullah S. í dómsskjölum. Hann er 30 ára gamall. Maðurinn braut á ungu konunni þegar þau voru bæði farþegar í næturlest, 7. ágúst á síðasta ári, sem var á leið frá Stuttgart til Ulm. Konan var sofandi en hvíldi höfuðið á borði. Hún vaknaði við það að maðurinn var í óðaönn að troða getnaðarlim sínum upp í munn hennar.

Maðurinn viðurkenndi brot sitt fyrir dómi. Hann sagðist hafa gert þetta einfaldlega af því hann langaði til þess. Hann er sagður eiga 11 systkini og hafa dóma á bakinu fyrir kynferðisbrot gegn börnum.

Maðurinn, sem er ólæs og óskrifandi, kom fyrst til Þýskalands árið 2015. Hann sagðist fyrir dómi hafa eytt þeim greiðslum sem hann fékk, sem hælisleitandi, frá hinu opinbera í Þýskalandi í áfengi og fíkniefni á meðan hann bjó í ókeypis húsnæði fyrir flóttamenn.

Hann gaf ekki mikið fyrir ferlið fyrir dómstólnum og sagði það vera eintómt „bla, bla, bla.“

Maðurinn var fyrst í varðhaldi en síðar fluttur á geðsjúkrahús eftir að hann sagðist heyra raddir.

Lögreglan segir að maðurinn hafi neitað að taka þátt í sérstakri meðferðaráætlun fyrir menn sem hafa framið ítrekuð kynferðisbrot.

Dómur verður kveðinn upp yfir manninum í febrúar næstkomandi en ekki hafa fengist upplýsingar um stöðu umsóknar hans um hæli í Þýskalandi.