Sálfræðingurinn Ragnhildur Þórðardóttir, einnig kölluð Ragga nagli, hvetur fólk til að leggja ekki stein í götu þeirra sem vilja halda sér þurrum um áramótin. Frekar ætti að hrósa, hvetja og bjóða upp á óáfengar veigar.

„Ef þínar tær kreppast og efri vörin krullast þegar einhver er ekki með gin í annarri og tónik í hinni þá er líklega tímabært að þú skoðir þína eigin afstöðu til áfengisdrykkju,“ segir Ragnhildur í færslu á samfélagsmiðlum. „Ein besta ákvörðun sem Naglinn hefur tekið var árið 2012 að hætta að drekka áfengi því það einfaldlega passaði ekki inn í lífsstílinn.“

Lúftgítar og trúnó

Þrátt fyrir að vera edrú segist hún í banastuði þegar hún fer á djammið. Missi sig yfir Bubba og Egó, geri lúftgítar og lúfttrommur, dansar uppi á borðum, fer á trúnó inni á klósetti og haldi spontant ræður.

„En Naglinn púllar Houdini og lætur sig yfirleitt hverfa úr partýum uppúr klukkan eitt,“ segir hún. Góður vinur sagði eitt sinn: „Eftir eitt, gerist ekki neitt“. Allavega ekki neitt sem er mannbætandi eða uppbyggilegt“

Flestir virða ákvörðunina

Hún segir flesta virða þessa ákvörðun og ekki reyna að beita hópþrýstingi. Einstaka geri það þó ekki.

„Kommonn maður…einn sjúss drepur nú engan.“ „Hva´ er kjellingin á snúrunni?“ „Æi… það er skemmtilegra ef allir eru að drekka“ eru frasar sem eru til þess fallnir að valda hópþrýstingi og smánun þeirra sem ekki drekka áfengi.

„Líf án áfengis er sparnaður bæði í andlegum og materíalískum skilningi. Sparnaður á hitaeiningum. Sparnaður á peningum. Sparnaður á kvíða. Sparnaður á móral. Sparnaður á samviskubiti…. Djammviskubiti. Sparnaður á timburmönnum. Líf án áfengis er gróði í öllum skilningi,“ segir hún.