Hagsmunasamtök írskra sjávarútvegsfyrirtækja, IFPO, saka Íslendinga um rányrkju á makríl. Veiðin sé langt yfir sjálfbærnismörkum stofnsins.
Við sjávarútvegsmiðilinn Seafoodsource segir Aodh O´Donnell, framkvæmdastjóri IFPO, að Íslendingar hafi viljandi stundað ofveiði undanfarin tíu ár. Kvótinn sé þrefalt meiri en Írar setja sér.
Á síðasta ársfjórðungi hafi Íslendingar landað 120 þúsund tonnum í norskum höfnum til að framleiða fiskimjöl.
Óformlegar viðræður eru í gangi á milli íslenskra stjórnvalda og Evrópusambandsins um fiskveiðar sem gætu leitt til þess að íslensk skip fái að veiða að einhverju marki í fiskveiðilögsögu Evrópusambandslanda, þar á meðal Írlands. The Irish Examiner greindi frá því í október að Charlie McConalogue, landbúnaðarráðherra Írands, hefði opinberað þessar viðræður.
IFPO hafa áhyggjur af því að hleypa Íslendingum inn í sína fiskveiðilögsögu, sem er rík af makríl. En íslensk skip veiða nú þegar makríl alveg upp við mörk hennar. Það er nálægt eyju sem kallast Co Donegal´s Tory eyja.
Patrick Murphy, framkvæmdastjóri fiskveiðisamtakanna SSWFPO, sagði að írskir útgerðarmenn yrðu að fá að vera viðstaddir allar viðræður þessu lútandi. „Ég óttast mjög að það verði samið og að Írland verður það land sem hagnast minnst á samningnum,“ sagði hann.
Írar hafa ekki aðeins beint sjónum sínum að því sem þeir kalla ofveiði Íslendinga, heldur einnig Norðmanna og Færeyinga.
O´Donnell sagði að þessar þrjár þjóðir veiddu 40 prósent meira af makríl og lýsu en vísindamenn mæltu með. Þar með væru þessar þrjár þjóðir að ógna sjálfbærni veiðanna í Norður Atlantshafi.
