Manchester United goðsögnin og sparspekingurinn Gary Neville telur að Liverpool vanti djúpan miðjumann til að geta barist við Arsenal og Manchester City um Englandsmeistaratitilinn allt til enda.

Liverpool hefur farið vel af stað á leiktíðinni og er með 17 stig eftir átta leiki, 3 stigum frá toppliðum Tottenham og Arsenal. City er svo með 18 stig í þriðja sæti.

Neville telur þó að Liverpool og Tottenham haldi ekki í við Arsenal og City, sem börðust um Englandsmeistaratitilinn á síðustu leiktíð.

Hann bendir á að Liverpool sé með marga frábæra menn í mörgum stöðum en það vanti leikmenn eins og Declan Rice hjá Arsenal og Rodri hjá Manchester City.

„Miðja þeirra er sóknarsinnuð. Hefur hún það sem til þarf varnarlega til að gera eins og Arsenal gerði núna gegn City eða þegar Rodri kemur aftur í lið City? Ef þú setur Declan Rice eða Rodri aftastan á miðju Liverpool tel ég að þeir ættu klárlega að geta unnið titilinn,“ segir Neville.

„Ég set spurningarmerki við hvort þeir séu nógu þéttir á miðjunni. Ég held að Liverpool geti ekki orðið meistari en þeir eru með í kapphlaupinu út af stjóra þeirra, sem er stórkostlegur. En ég held að undir lok tímabils verði þetta á milli Arsenal og City.“