Samkvæmt frumvarpi til fjárlaga fyrir árið 2024, sem kynnt var í morgun, er meðal annars kveðið á um að fjármála- og efnahagsráðherra verði veittar tilteknar heimildir til að selja hlutabréf í eigu ríkisins en einnig að kaupa hlutabréf fyrir hönd ríkisins. Einnig yrði ráðherranum, samkvæmt frumvarpinu veittar heimildir til að gera ýmsar ráðstafanir vegna umsýslu félaga.
Meðal heimildanna er að selja eignarhlut ríksins í Íslandsbanka en eins og kunnugt er reyndist sala sem ráðist var í fyrr á þessu ári á hluta af hlutabréfum ríkisins í bankanum afar umdeild. Hún endaði með því að í júní síðastliðnum gerði Seðlabanki Íslands samkomulag við Íslandsbanka hf. um að ljúka með sátt máli vegna brota Íslandsbanka við sölumeðferð eignarhluta ríkisins í bankanum.
Eftir hina umdeildu sölu á ríkið, samkvæmt vefsíðu Bankasýslu ríkisins, 42,5 prósent eignarhlut í Íslandsbanka. Verði þetta ákvæði fjárlagafrumvarpsins samþykkt óbreytt á Alþingi verður fjármála- og efnahagsráðherra veitt heimild til að selja þennan hlut í heild sinni.
Í frumvarpinu er einnig kveðið á um að ráðherra verði veitt heimild til að selja eignarhlut ríkisins í Landsbankanum hf. „umfram 70% hlut ríkisins af heildarhlutafé bankans“. Samkvæmt vefsíðu Bankasýslu á íslenska ríkið nú 98,2 prósent hlutafjár í Landsbanakanum.
Meðal annarra heimilda til sölu hlutabréfa í eigu ríksins og ráðstafana vegna umsýslu félaga sem frumvarpið veitir fjármálaráðherra eru eftirfarandi:
Að selja eignarhlut ríkisins í Sparisjóði Austurlands hf.
Að nýta samningsbundinn eða lögbundinn rétt til innlausnar eða kaupa á hlutum í fjármálafyrirtækjum sem að hluta eru í eigu ríkisins.
Að nýta samningsbundinn rétt til að breyta láni Vaðlaheiðarganga hf. í langtímalán og í hlutafé eða annan rétt til að taka við hlutafé í félaginu.
Að selja eignarhlut ríkisins í Endurvinnslunni hf.
Að ganga til samninga við eigendur Landsnets ohf. um kaup eða tilfærslu eignarhluta í félaginu til ríkissjóðs.
Að leggja Fasteignum Háskóla Íslands ehf. til fasteignir í eigu ríkissjóðs sem nýttar verða undir háskólastarfsemi, eða tengda starfsemi, með útgáfu skuldabréfs eða lánalínu.
Að heimila Háskóla Íslands að stofna sérstakt félag utan um eignarhald á rannsóknar- eða sprotafyrirtækjum sem háskólinn hefur aðkomu að.
Að heimila Vegagerðinni að slíta Herjólfi eignarhaldsfélagi ehf. og ráðstafa eignum þess til ríkisins.
