Samkvæmt ferðavef CNN hefur floti einkaþota á heimsvísu meira en tvöfaldast á síðustu tveimur áratugum.

Útblástur frá einkaþotum er að minnsta kosti tíu sinnum meiri á hvern farþega en útblástur frá farþegaþotum.

Samkvæmt skýrslum um flugiðnaðinn þá er ein af hverjum sex flugferðum sem bandarísk flugmálayfirvöld hafa umsjón með flogin með einkaflugvélum en sá hluti flugiðnaðarins greiðir aðeins 2 prósent af heildarsköttum sem þessi atvinnugrein greiðir í Bandaríkjunum.

Einn eigandi einkaþotu hefur hins vegar ákveðið að taka skref til baka.

Stephen Prince er varaformaður samtakanna Patriotic Millionaires, sem eru samtök auðugra Bandaríkjamanna, sem berjast fyrir skattahækkunum á auðugt fólk ætlar að selja Cessna 650 Citation III þotuna sína. Þotan er með rými fyrir níu farþega.

Prince tjáir CNN að hann hafi elskað að geta flogið í einkaþotu og hann hafi þess vegna hunsað hversu miklum skaða hann væri að valda á umhverfinu og kynslóðum framtíðarinnar. Hann segist verða að breytast og að hann geti ekki haldið svona áfram.

Þessi tiltekna þota er ekki sú fyrsta sem Prince eignaðist en er sú stærsta og dýrasta. Rekstrarkostnaður þotunnar á hverju ári nemur andvirði um það bil 40 milljóna íslenskra króna.

Prince segir svo þægilegt að ferðast með einkaþotu að það verði ávanabindandi. Hann ætlar samt að láta sig hafa það að ferðast með áætlunarflugi. Hann segist fyrirlíta allt sem fylgir þeim ferðamáta; öryggisleit, langar biðraðir, aflýstar ferðir og glataður farangur en hann ætlar samt að standa við ákvörðun sína um að losa sig við einkaþotuna.

Hann er þó ekki alfarið hættur að nota einkaflugvélar. Vinur hans ætlar að leigja honum flugvélina sína sem er minni skrúfuþota en útblásturinn frá henni er um fjórðungur af útblæstri Cessna-þotu Prince. Hann segist ætla að nota skrúfuþotuna tvisvar til þrisvar á ári til að fara á veiðar.

Prince segist ekki ætla að þrýsta á auðuga vini sína að selja einkaþoturnar sínar en hann ætlar að halda áfram að berjast fyrir því að auðmenn í Bandaríkjunum greiði hærri skatta. Hann segir auðmenn landsins, þar á meðal hann sjálfur, vera gráðuga og að þeir verði að vera hluti af bandarísku þjóðfélagi en ekki skapa sér sitt eigið samfélag.