Bæjarráð Garðabæjar samþykkti á fundi sínum í morgun að bæjarstjórinn, Almar Guðmundsson, fengi 2,5 prósent launahækkun frá og með 1. júní 2023. Þetta er minni launahækkun en Almari bar samkvæmt ráðningarsamningi frá 7. júní 2022. Samkvæmt samningnum áttu laun Almars að taka breytingum í júní ár hvert í samræmi við breytingar á launavísitölu sem gefin er út af Hagstofu Íslands. Áttu breytingarnar á launum Almars að miða við launavísitöluna eins og hún stóð í júní 2022.
Nýjasta mæling á launavísitölunni, á vef Hagstofunnar, er frá apríl á þessu ári. Frá því í júní 2022 og fram að apríl hækkaði launavísitalan um 9 prósent og því ljóst að Almar fer á mis við meginþorra þeirrar hækkunar sem hann átti rétt á.
Þegar Almar var ráðinn bæjarstjóri í júní 2022 ákvað bæjarráð að heildarlaun hans í upphafi yrðu tæplega 2.7 milljónir króna á mánuði.
Ráðningarsamningurinn við Almar var umdeildur í bæjarráði og þótti fulltrúum minnihlutans í bæjarstjórn laun hans vera of há. Sara Dögg Svanhildardóttir fulltrúi Viðreisnar lét bóka í fundargerð ráðsins meðal annars:
„Laun bæjarstjóra Garðabæjar eru í engu samræmi við almenna launaþróun í landinu og með engu móti hægt að styðja við þau launakjör sem hér um ræðir sé tekið mið af umfangi sveitarfélagsins Garðabæjar.“
Miðað við þessar breytingar á launahækkun Almars ættu mánaðarlaun hans, eftir þessa minnkun bæjarráðs á þeirri launahækkun sem hann átti rétt á samkvæmt ráðningarsamningi, að hækka um tæplega 68.000 krónur. Sé miðað við launavísitöluna eins og hún var í apríl á þessu ári hefðu mánaðarlaun hans hins vegar átt að hækka um rúmlega 243.000 krónur.
