Verklagi Íslandsbanka við skilgreiningu viðskiptavina er verulega ábótavant og verklagi Landsbankans og Arion banka ábótavant að mati Fjármálaeftirlitsins. Þessu til viðbótar hefur Íslandsbanki skilað eftirlitinu röngum skýrslum um ónýttar útlánaheimildir.

Fjármálaeftirlit Seðlabankans birti í dag athugasemdir við meðhöndlun Landsbankans, Íslandsbanka og Arion banka á meðhöndlun lítilla og meðalstórra félaga (e. SEM – small and medium sized enterprises) í útreikningi á eiginfjárþörf og notkun breytistuðla.

Fjármálaeftirlitið hóf í mars á síðasta ári athugun á verklagi stóru bankanna þriggja. Niðurstöður voru birtar eftir lokun Kauphallarinnar í dag og er verklagi ábótavant hjá þeim öllum. Sýnu verst virðist ástandið vera í Íslandsbanka.

Fundið er að verklagi Landsbankans og Arion banka við mat á því hvaða skuldbindingar eru tækar til lækkunar á áhættugrunni hafi verið ábótavant. Fleiri athugasemdir voru gerðar, auk kröfu um viðeigandi úrbætur.

Um Íslandsbanka segir að verklagi bankans við mat á því hvaða skuldbindingar eru tækar til lækkunar á áhættugrunni hafi verið verulega ábótavant. Ekki kemur fram hvort gerð hafi verið krafa um úrbætur.

Þessu til viðbótar segir Fjármálaeftirlitið að flokkun Íslandsbanka á ónýttum útlánaheimildum í COREP skýrslu hafi verið röng og ekki í samræmi við skráðar reglur.

Eyjan leitaði eftir viðbrögðum frá Íslandsbanka vegna þessa en engin svör höfðu borist kl. 17.