Söngkonan Elísabet Ormslev segist ekki kannast við að hafa fengið afsökunarbeiðni frá tónlistarmanninum Pétri Erni Guðmundssyni. Pétur Örn birti yfirlýsingu þess efnis á Facebook-síðu sinni í gær að hann bæðist innilegrar afsökunar á framkomu sinni gagnvart henni.
Elísabet opnaði sig í febrúar í fyrra í einlægu viðtali við Fréttablaðið um samband þeirra, sem hófst þegar hún var 16 ára gömul og Pétur Örn 38 ára. Sagði hún samband þeirra hafa einkennst af andlegu ofbeldi og umsátri og Pétur Örn hafa „groom-að“ hana á þeim tíma. Löngu eftir að sambandinu lauk hafi Pétur Örn haldið áfram að sitja um hana og valda henni ónæði, en Elísabet er fyrir nokkrum árum komin í nýtt samband og á ungt barn. Í kjölfar viðtalsins var Pétri Erni vikið úr hljómsveitunum Buffi og Dúndurfréttum.
Í áðurnefndri yfirlýsingu gekkst Pétur Örn ekki við ásökununum en sagðist þó sjá eftir gjörðum sínum.
„Fyrir rétt rúmum þrettán árum kynnist ég ungri manneskju og náðum við vel saman og hófum að hittast. Það var rangt og dómgreindarleysi af minni hálfu og ber ég einn ábyrgð á þeirri ákvörðun. Samskipti okkar stóðu yfir í meira eða minna 11 ár með mislöngum stoppum og hléum. Ég sé eftir þessu og harma það mjög hafa sært viðkomandi. Það var aldrei ætlun mín og biðst ég innilegrar afsökunar á því,” skrifaði tónlistarmaðurinn.
Í stuttri færslu á Twitter áréttar Elísabet að Pétur Örn hafi aldrei beðið hana afsökunar. „Ég fagna allri sjálfsvinnu og vilja til betrumbætingar en ég legg ekki opinberar yfirlýsingar að jöfnu við persónulega afsökunarbeiðni,” skrifar Elísabet.
Að gefnu tilefni:
Ég hef ekki fengið neina afsökunarbeiðni. Ég fagna allri sjálfsvinnu og vilja til betrumbætingar en ég legg ekki opinberar yfirlýsingar að jöfnu við persónulega afsökunarbeiðni.
— Elísabet Ormslev (@elisabet0rmslev) April 21, 2023
