Alpha sérsveit úkraínsku leyniþjónustunnar SBU hefur reynst Rússum erfið viðureignar síðan stríðið í Úkraínu hófst. Sveitin hefur eyðilagt hergögn að verðmæti sem svarar til um 660 milljarða íslenskra króna.

Express skýrir frá þessu og segir að meðal þess sem sérsveitin hafi eyðilagt séu rúmlega 1.500 skriðdrekar, tæplega 3.000 brynvarin ökutæki, 2.655 fallbyssur og 4 þyrlur.

Volodymyr Zelenskyy, forseti Úkraínu, var viðstaddur afmælisfagnað sérsveitarinnar í síðustu viku en þá var haldið upp á þrjátíu og eins árs afmæli hennar.

Hvað varðar verðmæti hergagnanna, sem sérsveitin hefur eyðilagt, þá eru flugvélarnar, sem voru eyðilagðar í hinni djörfu „köngulóarvefsaðgerð“ ekki taldar með. Í þeirri aðgerð eyðilagði sérsveitin tugi rússneskra herflugvéla á flugvöllum víða um Rússland.

Á síðustu tveimur vikum eyðilagði sérsveitin 39 skriðdreka, 14 loftvarnarkerfi og 17 skotfærageymslur.

Sveitin réðst á Kirovsk herflugvöllinn á Krím um síðustu helgi og eyðilagði þrjár árásarþyrlu og tvö loftvarnarkerfi.