„Ég man ekki eftir því áður fyrr, svona í hinni almennri umræðu, að fólki fyndist það þurfa að takmarka barneignir sínar vegna þess að það hefði ekki efni á því að fæða og klæða meira en eitt til tvö börn,“ segir Björt Ólafsdóttir þingmaður Bjartrar Framtíðar en hún segir illa búið að barnafólki hér á landi.

Í pistli sem birtist á Vísi segir Björt að dýrt sé að koma undir sig fótunum. „Vera eignalaus, vera á leigumarkaði, eða að skuldsetja sig til þess að koma sér upp húsnæði. Það er dýrt að mennta sig (allt á verðtryggðum lánum sem engin skuldaniðurfelling nær til) til þess að leitast við að búa í haginn fyrir sig og fjölskyldu sína. Og síðast en ekki síst er það tímafrekt og dýrt að vinna sig upp í stöður sem gefa ágætlega af sér.“

Þá bætir hún við að unga fólki haldi uppi hagvexti og lífeyriskerfi hérlendis fyrir þá sem eldri eru. „Þannig reiða hinir eldri sig líka á að þau ungu þverri ekki krafturinn. Að það kikni ekki undan álaginu og flytji jafnvel erlendis heldur njóti árangur erfiðis síns og geti um leið veitt börnum sínum reglulega einhver gæði,“ ritar Björt og bendir á að rúmlegur helmingur eldri borgara þurfi ekki að horfast í augu við sömu fjárhagslegu skuldbindingar og ungt fólks svosem húsnæðislán, leikskólagjöld og námslán.

„Ég velti því fyrir mér hvort bókasafnskortin og sundferðirnar þurfi að vera á afslætti hjá því fólki? Við megum að sjálfsögðu ekki letja gamalt fólk, það er gott upp á heilsu og gæði lífs að halda fólki virku með réttum hvötum. En hvernig væri að gefa unga fólkinu líka séns?“