Leikarinn Keanu Reeves hefur fengið nálgunarbann gegn manni sem heldur því fram að þeir séu skyldir.

Lögmaður Reeves lagði fram beiðnina fyrir dómstólum í Los Angeles á þriðjudag til að vernda Reeves og kærustu hans, Alexöndru Grant frá manni sem þau segja að hafi áreitt þau mánuðum saman.

Umræddur maður heitir Bryan Keith Dixon og er 38 ára gamalt. Hann er sagður hafa komið óboðinn inn á eign Reeves í Hollywood Hills sex sinnum frá því í nóvember á síðasta ári og reyndi í öll skiptin að komast í samband við Reeves.

Þetta gekk svo langt að Reeves þurfti að ráða öryggisteymi til að rannsaka málið.

Dixon hefur ítrekað deilt því á samfélagsmiðlum að hann og Reeves séu blóðskyldir og kallar hann sig í þeim færslum – Jasper Keith Reeves. Segir hann að það sé hans vilji að leikarinn verði lögráðamaður hans.

Er Dixon sagður hafa skilið eftir bakpoka á eign leikarans þar sem finna mátti DNA-próf, en það mun hafa verið tilraun Dixon til að sanna skyldleika sinn við Reeves. Leikarinn hefur þó þverneitað þessum meintu blóðtengslum.

Þetta er ekki í fyrsta sinn sem Reeves þarf að óska eftir nálgunarbanni. Árið 2014 var hin fimmtuga Kerry Colen Raus úrskurðuð í nálgunarbann eftir að hún fannst á heimili Reeves þar sem hún hafði meðal annars synt í sundlaug hans og farið í sturtu inn á heimili Reeves. Samkvæmt gögnum frá dómstólum hafði Raus glímt við andleg veikindi.