Úkraínski herinn segist hafa fellt og sært um 500 rússneska hermenn í árás á bráðabirgðabækistöð rússneska hersins í bænum Chulakivka, sem er í þeim hluta Kherson-héraðs sem Rússar hafa á sínu valdi, á gamlársdag.

CNN skýrir frá þessu.  Ef þetta er rétt þá var gamlársdagur mjög blóðugur fyrir Rússa því áður hefur komið fram að Úkraínumenn gerðu flugskeytaárás á bækistöð þeirra í Makiivka um það leyti sem nýja árið gekk í garð. Segja Úkraínumenn að um 400 rússneskir hermenn hafi fallið í þeirri árás og um 300 særst. Rússar hafa viðurkennt að 89 hermenn hafi fallið.

Óvenjuleg játning rússneskra yfirvalda – Mikil reiði í Rússlandi

„Óvinurinn heldur áfram að missa hermenn. Það er staðfest að á gamlársdag hæfðu úkraínskar hersveitir höfuðstöðvar og birgðageymslu óvinarins nærri Chulakivka í Kherson-héraði,“ segir í tilkynningu frá úkraínsku herstjórninni.

CNN hefur eftir talskonu úkraínska hersins í suðurhluta Úkraínu að árás hafi verið gerð á höfuðstöðvarnar og að fleiri slíkar árásir verði gerðar. Rússnesk yfirvöld hafa ekki tjáð sig um málið.