Jón Gunnarsson, dómsmálaráðherra, ætlar að efla búnað fangavarða og auka þjálfun þeirra. Hann segir að mjög alvarleg þróun eigi sér stað í fangelsum landsins þar sem ofbeldi hefur aukist sem og vopnaburður fanga.

Morgunblaðið skýrir frá þessu í dag. Fangaverðir hafa kallað eftir varnarbúnaði og aukinni þjálfun og hyggst Jón verða við þessu. Morgunblaðið hefur eftir honum að öryggi fangaverði sé í hæsta forgangi eins og öryggi lögreglumanna.

„Það sem á sér stað innan veggja fangelsa endurspeglar þá þróun sem við verðum nú vitni að í samfélaginu. Ég hef verið í miklu samtali við fangelsisyfirvöld og það er ljóst að bregðast þarf við á mörgum sviðum,“ sagði Jón.

Hann sagði að fangaverðir muni fá högg- og hnífavesti auk þess sem „vel komi til skoðunar“ að fangaverðir fái aðgang að rafbyssum.

Bæði lögreglumenn og fangaverðir hafa óskað eftir þessum búnaði.

Hægt er að lesa nánar um málið í Morgunblaðinu í dag.