Mikil spenna ríkir nú fyrir landsfundi Sjálfstæðismanna en þar verður kosið um embætti formanns flokksins nú í hádeginu. Sitjandi formaður, Bjarni Benediktsson, freistar þess að ná endurkjöri en honum barst mótframboð frá Guðlaugi Þór Þórðarsyni, en Guðlaugi er spáð góðu gengi þó svo að veðbankar haldi að Bjarni muni hafa betur.

Engu að síður hefur Bjarni haft vaðið fyrir neðan sig og verið duglegur að gefa kost á sér til viðtala undanfarið og gætt sín að vera sýnilegur. Til dæmis fyrir landsfund í gær gátu stuðningsmenn hans bæði skellt sér í brunch með Bjarna Ben og svo í fordrykk með Bjarna Ben í gærkvöldi.

Þingmaður Pírata, Björn Leví Gunnarsson, gagnrýndi fordrykkinn og taldi að þarna væri á ferðinni lokað boð fyrir útvalda. Það væri óþarfa snobb.

Fljótlega varð Birni þó ljóst að þarna var opið boð fyrir alla stuðningsmenn og eftir að Björn varð harðlega gagnrýndur fyrir að gagnrýna fordrykkinn, og bent á að það gæti varla talist snobb að fá sér fordrykk, ákvað hann að biðjast formlega afsökunar.

Ég var með ómálefnalega gagnrýni á þetta boð. Hélt að þetta væri lokað boð og fannst það snobbað miðað við tilefni.

Ég dreg þá gagnrýni til baka og segi: Afsakið. Þetta var ekki rétt hjá mér pic.twitter.com/o3jymDR2rR

— Bjorn Levi (@_bjornlevi_) November 5, 2022