Tómas Ellert Tómasson ,byggingaverkfræðingur, segir staðfest að dæmi séu um, að við gerð fasteignamats næsta árs, hafi Þjóðskrá Íslands, tekið fram fyrir hendur byggingafulltrúa sveitarfélaga og skráð nýbyggingar á hærra matsstig en þær eru í raun. Með þessu sé Þjóðskrá að fara gegn lögum þar sem skýrt komi fram að það sé verk byggingafulltrúa að sjá um slíkar skráningar.

Þetta kemur fram í grein sem Tómas ritaði og birti hjá Vísi í dag.

Tómas segir að þetta þýði í stuttu máli að þetta leiði til hærri fasteignagjalda og erfðafjárskatts sem greiða þurfi af eignum því fasteignamatið skapi grundvöll fyrir álagningu opinberra gjalda. Þetta hærra matsstig hækki einnig álagningarstofn fasteignagjalda sveitarfélaga.

„Fasteignamatið er einnig notað í ýmsum öðrum tilgangi. Til dæmis er fjárhæð stimpilgjalds vegna þinglýsingar kaupsamnings háð fasteignamati eignar eignar. Enn fremur miða sumar lánastofnanir veðhæfni fasteigna við ákveðið hlutfall af fasteignamati.“

Tómas segir mikilvægt fyrir fasteignaeigendur að ganga úr skugga um að fasteignir þeirra séu rétt skráðar. Ef upplýsingar séu ekki réttar þá skuli koma athugasemdum á framfæri við byggingarfulltrúa í viðeigandi sveitarfélagi. En ef eigendur telja að fasteignamat endurspegli ekki gangverð þá sé hægt að gera athugasemd eða sækja um endurmat.

„Hvað olli því svo og í hvaða tilgangi Þjóðskrá tók fram fyrir hendur byggingafulltrúa landsins við skráningu matsstigs fasteigna við gerð fasteignamats fyrir árið 2023 ferða forstjóri Þjóðskrár og innviðaráðherra sem ber ábyrgð á stofnuninni að svara fyrir.“

DV hefur sent fyrirspurn á Þjóðskrá Íslands og Sigurð Inga Jóhannesson, innviðaráðherra, vegna málsins og bíður eftir svörum.